Psonm 81 - Labib An Kreol Seselwa

Kantik pour Lafet

Psonm Asaf.

¹ Annou sant for pour Bondye nou protekter! Annou kriy nou lazwa ver Bondye Zakob!

² Zwe lanmizik! Fer tanbouren rezonnen! Zwe lalir avek laarp!

³ Soufle tronpet ler nouvellin, ler plenn lin, pour nou lafet.

⁴ Annefe, sa i en lalwa pour pep Izrael, en desizyon sorti kot Bondye Zakob.

⁵ Sa i en regleman pour desandan Zozef, kan i ti al lager kont Lezip. Mon antann en lavwa ki mon pa konnen,

⁶ Mon'n tir fardo ki ti lo ou zepol e ou lanmen in les tonbe sa pwa lour.

⁷ Dan ou maler ou ti kriye e mon ti vin sov ou. Mon ti reponn ou depi dan sekre loraz; mon ti teste ou kot sours Meriba.

⁸ Mon pep! Ekout mon lavertisman. Si selman Izrael ti oule ekout mwan!

⁹ I pa devre annan bondye etranze parmi zot; ou pa devre ador okenn bondye etranze.

¹⁰ Mwan menm SENYER ou Bondye ki ti fer ou sorti dan pei Lezip. Ouver gran ou labous e mon ava donn ou manze.

¹¹ Me mon pep pa ti ekout mon lavwa. Izrael ti refize obeir mwan.

¹² Alor, mon ti les zot avek zot leker dir, pour zot fer koman zot oule.

¹³ Mon ti ava kontan si mon pep ti ekout mwan, si Izrael ti swiv mon semen!

¹⁴ Alor, deswit mon ti ava imilye zot bann lennmi; mon ti ava kraz zot bann ladverser.

¹⁵ Sa bann ki ay mwan ti pou vin flat mwan e Izrael ti ava viv anpe pour touzour.

¹⁶ Mon ti ava nouri ou avek meyer kalite dible e donn ou dimyel sovaz ziska ki ou ti ava rasazye.