Psonm 80 - Labib An Kreol Seselwa

Lapriyer pour Demann Restorasyon Pei

¹ Berze Izrael ki gid bann desandan Zozef parey en troupo! Ekoute. Ou ki lo tronn par lao bann seriben, montre ou laglwar

² devan Efraim, Benzamen ek Manase! Revel ou pwisans e delivre nou!

³ Mon Bondye! Retabli nou. Fer ou vizaz briy lo nou e sov nou.

⁴ SENYER Bondye liniver! Ziska kan ou pou montre ou ankoler kont lapriyer ou pep?

⁵ Ou'n nouri zot avek dipen ki ti ganny petri dan larm; ou'n fer zot bwar en kantite larm.

⁶ Ou'n fer nou vin en size dispit pour nou vwazen. Nou bann lennmi i riy nou.

⁷ Bondye liniver! Retabli nou. Fer briye ou vizaz lo nou e sov nou.

⁸ Ou'n pran en plan rezen Lezip. Ou'n sas son bann zabitan e ou'n replant li.

⁹ Ou ti defris later; son rasin ti desann o profon later e i ti kouver pei antye.

¹⁰ Son lonbraz ti kouver bann montanny; son bann brans ti mont pli o ki bann gran pye sed.

¹¹ I ti file ziska bor lanmer e bann bourzon ti ariv ziska larivyer Efrat.

¹² Akoz ou'n defons son bann baraz e les bann pasan vol son bann fri?

¹³ Bann koson maron sorti dan lafore i vin fer ravaz e tou bann zannimo dan laplenn i vin manze.

¹⁴ Bondye liniver! Retournen. Depi lao dan lesyel, get sa ki pe arive! Pran swen sa plantasyon rezen.

¹⁵ Protez sa plantasyon rezen ki ou'n plante, sa zenn garson ki ou'n fer grandi.

¹⁶ Lennmi in met dife ladan, in koup li. Dan ou lakoler, fer zot disparet devan ou.

¹⁷ Protez sa pep ki ou'n swazir; prezerv sa nasyon ki ou'n donn lafors.

¹⁸ Alor, zanmen nou pou kit ou ankor. Fer nou reviv e nou ava glorifye ou non.

¹⁹ SENYER! Bondye liniver! Retabli nou. Fer ou vizaz briye lo nou. Sov nou.