Psonm 77 - Labib An Kreol Seselwa

Rekonfor dan Letan Maler

Psonm Asaf.

¹ Mon kriy for ver Bondye; mon apel Bondye avek tou mon lafors pour li antann mwan.

² Kan mon dan maler, mon tourn ver SENYER. Dan lannwit, mon reste lanmen anler, san repo; mon refize ganny konsole.

³ Mon mazin Bondye, mon plennyen devan li. Plis mon reflesir, mon perdi kouraz.

⁴ Ou anpes mon lizye fermen. Mon telman trakase ki mon pa kapab koze.

⁵ Mon mazin letan lontan; mon rapel bann lannen pase.

⁶ Aswar, mon reflesir atraver mon lanmizik; mon mazinen, mon demann dan mwan menm:

⁷ Eski SENYER pou rezet nou pour touzour? Eski i pa pou montre nou son faver ankor?

⁸ Eski son fidelite anver nou in disparet pour touzour? Eski son promes in fini pour debon?

⁹ Eski Bondye in oubliy son konpasyon anver nou? Eski dan son lakoler, i nepli annan okenn konpasyon pour nou?

¹⁰ Mon dir dan mwan menm: Sa ki bles mwan, se ki Bondye Treo in sanz son fason fer.

¹¹ Mon pou rapel tou bann gran mervey ki SENYER in fer; mon pou mazin son bann mervey letan pase.

¹² Mon pou medit lo tou sa ki ou'n fer; mon pou mazin tou ou bann gran mervey.

¹³ Mon Bondye! Tou sa ki ou fer i sen. Lekel bondye ki osi gran ki nou Bondye?

¹⁴ Zis ou sa Bondye ki fer bann mervey. Ou'n montre ou pwisans devan tou bann pep.

¹⁵ Par ou lafors, ou'n sov ou pep, bann desandan Zakob ek Zozef.

¹⁶ Mon Bondye! Bann delo ti war ou. Ler zot ti war ou, zot ti tranble; menm fon lanmer ti per.

¹⁷ Bann nyaz ti devers lapli; loraz ti kriye dan lesyel; zekler ti klate dan tou direksyon.

¹⁸ Tapaz ou loraz ti roule dan en tourbiyon; ou zekler ti alim lemonn; later ti tranble e sekwe.

¹⁹ Ou ti pas atraver lanmer; ou ti fer en semen atraver fon lanmer. Me personn pa'n war ou lepa.

²⁰ Par lanmen Moiz ek Aaron, ou'n gid ou pep parey en troupo.