Psonm 73 - Labib An Kreol Seselwa

Lazistis Bondye

Psonm Asaf.

¹ Wi! Bondye i bon anver Izrael; anver dimoun avek en leker pir.

² Me mwan, mon ti pre pour tonbe; mon lipye ti'n preski glise.

³ Ler mon ti war koman bann malfeter pe prospere, mon ti zalou sa bann arogan.

⁴ Zot pa soufer; zot reste byen portan e an bonn sante.

⁵ Zot napa okenn traka parey lezot; maler pa tonm lo zot parey lo lezot dimoun.

⁶ Alor, lorgey i koman en kolye dan zot likou; vyolans i sel lenz ki zot mete.

⁷ Zot lizye i boufi avek lagres; zot leker i deborde avek mesanste.

⁸ Zot sikannen e fer konplo pour fer dimal; zot menase avek larogans.

⁹ Zot servi zot labous pour ensilte lesyel, zot lalang pour kritik tou lo later.

¹⁰ Pour sa rezon, dimoun i lo zot kote e anval zot parol parey delo.

¹¹ Zot dir: Koman Bondye i konnen? Eski Treo i annan konnesans?

¹² Get zot, sa bann move dimoun! Zot napa traka, zot kontinyen akimil larises.

¹³ Mon'n reste onnet pour nanryen; mon'n lav mon lanmen pour montre mon linosans.

¹⁴ Tou lazournen mon'n ganny bate; tou le bomaten mon ganny pini.

¹⁵ Si mon ti'n deside koz parey zot, mon ti ava'n trai ou pep.

¹⁶ Ler mon ti esey konpran, mon ti war sa tro difisil,

¹⁷ ziska ler mon ti'n antre dan sanktyer Bondye. La, mon ti konpran sa ki pou arive avek zot.

¹⁸ Vreman! Ou met zot lo bann semen glise; ou fer zot al ver zot destriksyon.

¹⁹ En sel kou, zot ti ganny detri; zot fini, lafreyer i balye zot.

²⁰ Ler ou leve SENYER, zot in disparet parey ler ou sorti dan en rev.

²¹ Ler mon leker ti dan lapenn, mon ti santi mwan konpletman desire.

²² Mon ti koman en abriti. Mon ti parey en bebet devan ou.

²³ Pourtan, mon touzour reste atase avek ou; ou atrap mon lanmen drwat.

²⁴ Ou kondwir mwan par ou bann konsey; apre, ou ava akey mwan dan laglwar.

²⁵ Lekel ki mon annan dan lesyel apard ou? Lo later, mon sel dezir, se zis ou.

²⁶ Mon lekor ek mon leker i'n fatige. Me Bondye i lafors mon leker, mon par patrimwann pour touzour.

²⁷ Annefe, dimoun ki lwen avek ou pou disparet; ou detri sa bann ki abandonn ou.

²⁸ Me pour mwan, kan mon apros avek Bondye, mon dan lazwa. Mon swazir Senyer BONDYE pour mon labri e mon pou rakont tou son bann byenfe.