Psonm 72 - Labib An Kreol Seselwa

Lapriyer pour Lape

Psonm Salomon.

¹ Mon Bondye! Donn lerwa lasazes pour pas bon zizman. Donn sa garson lerwa lazistis.

² I pou ziz ou pep avek drwatir e ou bann pov avek lazistis.

³ Montanny! Anmenn lape pour lepep. Kolin! Anmenn lazistis!

⁴ Lerwa ava defann lakoz bann pov, ed dimoun ki dan bezwen e kraz bann eksplwater.

⁵ Fer li viv ziska lafen lemonn, osi lontan ki lalin ek soley i briye.

⁶ I ava parey lapli ki tonm lo laplenn, e lapli ki aroz later.

⁷ Lazistis ava fleri pandan son renny. Lape ava dire osi lontan ki lalin i briye.

⁸ I pou gouvern depi en bout lanmer ziska lot, depi larivyer Efrat ziska dan bout later.

⁹ Bann zabitan dezer ava kourbe devan li e son bann lennmi ava lis lapousyer.

¹⁰ Bann lerwa Tarsis ek dan bann zil ava anmenn kado pour li. Bann lerwa Seba ek Saba ava donn li bann lofrann.

¹¹ Tou bann lerwa ava prostern devan li e tou bann nasyon ava servi li.

¹² Alor, i ava sekour bann malere ki demann led ek bann pov ki napa personn pour ed zot.

¹³ I ava pran pitye pour bann ki feb ek bann malere; i ava sov lavi bann pov.

¹⁴ I ava delivre zot kont lopresyon ek vyolans, akoz zot lavi i annan valer pour li.

¹⁵ Fer li viv lontan! Donn li lor ki sorti Seba; dimoun ava touzour priy pour li. Bondye ava beni li tou le zour!

¹⁶ Fer sa pei prodwi en kantite dible e bann kolin ava kouver avek bann zepi e son bann fri ava parey sa bann ki sorti Liban! Fer bann lavil ranpli avek zabitan parey zerb dan laplenn.

¹⁷ Son non ava ganny selebre pour touzour; son repitasyon ava dire pour touzour e bann pep ava pronons son non pour zot beni kanmarad. Tou bann nasyon i deklar li byennere!

¹⁸ Loue SENYER Bondye, Bondye Izrael! Li tousel ki fer bann mervey.

¹⁹ Beni son non glorye pour touzour! Son laglwar i ranpli later! Amenn! Amenn!

²⁰ Bann lapriyer David, garson Zese i fini la!