Psonm 71 - Labib An Kreol Seselwa

Lapriyer En Dimoun Aze

¹ SENYER! Mon vin pran refiz kot ou. Pa les mwan toultan ganny imilye.

² Dan ou lazistis, delivre mwan e sov mwan! Ekout mwan! Vin delivre mwan.

³ Ou menm sa Ros protekter, landrwa kot mon kapab vini nenport ki moman. Ou'n deside sov mwan, akoz ou mon Ros protekter e mon fortres.

⁴ Mon Bondye! Delivre mwan dan lanmen bann malfeter, e dan pouvwar kriminel ek dimoun vyolan.

⁵ Senyer BONDYE! Ou menm mon lespwar. Depi mon lazenes SENYER, mon fer ou konfyans.

⁶ Depi dan vant mon manman mon kont lo ou. Ou ki'n tir mwan dan vant mon manman. Toultan, mon pou sant ou louanz.

⁷ Mon lavi ti paret drol pour bokou dimoun. Me ou, ou mon lafors e mon protekter.

⁸ Mon labous i ranpli avek ou louanz; tou lazournen mon sant ou laglwar.

⁹ Pa rezet mwan dan mon vye zour; pa abandonn mwan ler mon nepli annan lafors.

¹⁰ Mon bann lennmi i koz lo mwan; zot fer konplo ansanm kont mwan.

¹¹ Zot dir: Bondye in abandonn li; napa personn pou delivre li, annou depese atrap li.

¹² Mon Bondye! Pa reste lwen avek mwan. Mon Bondye! Vit, vin delivre mwan.

¹³ Fer dimoun ki akiz mwan tonbe e ganny kouver ek laont; e sa bann ki rod mon maler tonm dan dezoner ek imilyasyon!

¹⁴ Mwan, mon pou kontinyen espere e mon pou touzour sant ou louanz.

¹⁵ Mon pou rakont bann gran keksoz ki ou'n fer. Tou le zour, mon pou fer konnen koman ou'n sov nou. I annan sitan bokou, ki mon pa pou kapab rakont tou.

¹⁶ Mon pou vin rakont bann mervey ki Senyer mon BONDYE in fer. Mon pou proklanm ou lazistis, selman ou lazistis.

¹⁷ Mon Bondye! Depi mon ti ankor zenn, ou'n ansenny mwan. Mon ankor pe proklanm bann mervey ki ou'n fer.

¹⁸ Mon Bondye! Aprezan ki mon'n vye avek seve blan, pa abandonn mwan. Les mwan proklanm ou lafors avek sa zenerasyon e ou pwisans avek zenerasyon fitir.

¹⁹ Mon Bondye! Ou lazistis i sitan gran ki i tous lesyel. Mon Bondye! Ou'n fer telman gran mervey! Mon Bondye! Lekel ki parey ou?

²⁰ Menm si ou'n fer mwan konn maler ek soufrans, ou pou redonn mwan lavi; ou pou fer mwan remonte, sorti dan profonder later.

²¹ Ou pou ogmant mon loner e konsol mwan ankor.

²² Mon pou loue ou avek laarp. Mon Bondye! Mon pou sant ou fidelite. Mon pou zwe lanmizik pour ou, Bondye Sen pep Izrael.

²³ Mon pou zwe lanmizik pour ou, mon pou sant mon lazwa, akoz ou'n sov mon lavi.

²⁴ Tou le zour, mon pou rakont ou lazistis, akoz sa bann ki ti oule fer mwan ditor, in ganny kouver avek laont ek dezoner.