Psonm 7 - Labib An Kreol Seselwa

En Lapriyer pour Demann Lazistis

En konplent sante par David anver SENYER, o size Kous, en Benzamit.

¹ SENYER, mon Bondye! Mon vin pran refiz kot ou. Sov mwan! Delivre mwan avek mon bann persekiter,

² avan ki zot desir mwan parey en lyon e trenn mwan avek zot, san ki personn i sov mwan.

³ SENYER, mon Bondye! Si mon'n fer ditor dimoun; si mon'n mal azir;

⁴ si mon'n fer dimal bann ki ti dan mon kote; si mon'n detri propriyete mon bann lennmi san rezon;

⁵ Si mon'n fer tousala, alor, lennmi ava pourswiv mwan e atak mwan. I ava kraz mwan vivan lo later e trenn mon loner dan lapousyer.

⁶ Dan ou lakoler, leve SENYER! Debout kont lakoler mon bann lennmi! Sov mwan, ou ki rann lazistis!

⁷ Tou bann pep lo later ava antour ou. Depi lo ou tronn lao, diriz ou pep.

⁸ SENYER! Ou ki ziz bann nasyon, rann zizman dan mon faver dapre mon lentegrite.

⁹ Bondye ki zis! Ou ki egzamin sa ki pase dan mon lespri e dan mon leker, fer fini mesanste bann malfeter. Ankouraz sa bann ki fer dibyen.

¹⁰ SENYER i mon protekter. I sov sa enn ki annan en leker pir.

¹¹ Bondye i en ziz ki zis; i endinyen sak zour.

¹² Lennmi i rekonmanse, i fit son lepe. I redi son lark e met li pare.

¹³ I prepar son bann zarm mortel e fer son bann dart vin bann tizon dife.

¹⁴ Gete! I dan douler lanfantman pour mesanste; i ansent avek lenzistis e i donn nesans mansonz.

¹⁵ Zot fouy en gran trou, me zot menm ki tonm ladan.

¹⁶ Maler ki zot ti'n prepare i retonm lo zot. Zot bann kou vyolan i retonm lo zot prop latet.

¹⁷ Mon pou remersye SENYER akoz i zis. Mon pou loue non SENYER Treo.