Psonm 68 - Labib An Kreol Seselwa

En Kantik Nasyonal Laviktwar

En psonm, en kantik David. Pour sef lakoral.

¹ Bondye i leve. Son bann lennmi i fann kler. Son bann ladverser i disperse devan li.

² Parey lafimen, ou fer zot disparet. Parey lasir devan dife, ou fer zot fonn. Bann malfeter pou disparet devan Bondye.

³ Zot ki zis! Montre zot lazwa. Selebre devan Bondye dan lazwa.

⁴ Sant pour Bondye! Loue son non par bann kantik! Sant en kantik pour sa enn ki vini dan nyaz lo son kales. SENYER i son non. Selebre avek lazwa devan li!

⁵ Dan son sanktyer sakre, Bondye i en papa pour bann orfelen e i protez bann vev.

⁶ Bondye i donn en fanmir sa enn ki tousel. I ouver laport laliberte pour bann prizonnyen. Me bann ki revolte i viv dan en later sek.

⁷ Mon Bondye! Ler ou ti kondwir ou pep, ler ou ti mars devan zot dan dezer,

⁸ devan ou, Bondye Sinai! Devan ou, Bondye Izrael! Later ti tranble, lapli ti deverse depi lesyel.

⁹ Mon Bondye! Ou ti fer en kantite lapli tonbe partou; ou'n redonn lavi ou pep ki ti'n randi.

¹⁰ Ou pep in ganny en plas pour etabli li. Mon Bondye! Dan ou labonte, ou'n prepar sa pei pour bann malere.

¹¹ SENYER i donn lord; en gran lafoul fanm i anons sa bon nouvel:

¹² Bann lerwa ek zot larme pe sove! Zot pe sove! Bann fanm ki'n reste dan kan pe partaz bann depouy lager.

¹³ Lezel pizon i kouver avek larzan e son bann plim i kouler lor pal.

¹⁴ Ler Bondye Toupwisan ti sas bann lerwa, lannez ti pe tonbe lo montanny Salmon.

¹⁵ Montanny Basann i parey montanny Bondye! Basann i en montanny avek en kantite latet.

¹⁶ Akoz sa montanny ki annan en kantite latet i zalou montanny kot Bondye i'n swazi pour li reste, la kot SENYER pou reste pour touzour?

¹⁷ Bondye i sorti Sinai; i desann dan son sanktyer sakre avek bann kales lager par milye.

¹⁸ SENYER Bondye! Ou'n mont lao. Ou'n anmenn bann prizonnyen avek ou. Bann pep in ofer ou kado, menm bann ki rebel kont ou.

¹⁹ Remersye SENYER tou le zour! Bondye ki nou Sover!

²⁰ Nou Bondye i en Bondye sover. BONDYE i Senyer ki sov nou dan lanmor.

²¹ Me Bondye pou kraz latet son bann lennmi ki, avek zot seve long, zot kontinyen viv en lavi koupab.

²² SENYER i deklare: Mon pou fer zot retournen sorti Basann. Mon pou fer zot sorti dan profonder lanmer.

²³ Konmsa, zot ava patoze dan disan; ou bann lisyen ava lis zot par disan lennmi.

²⁴ Mon Bondye! Nou'n war ou bann laprosesyon solannel, bann kortez mon Bondye, mon Lerwa, antre dan sanktyer.

²⁵ Bann santer i mars devan, bann mizisyen deryer. Dan milye, bann zenn fiy pe zwe lo tanbouren.

²⁶ Bann sours Izrael! Loue SENYER Bondye. Remersye Bondye dan bann lasanble.

²⁷ Benzamen ki pli pti tribi i vin premye; apre li, bann sef Zida dan lenz brode, bann sef Zabilon ek bann sef Neftali.

²⁸ Bondye! Montre ou pwisans. Bondye! Montre ou lafors parey ou'n deza fer pour nou.

²⁹ Kot ou tanp dan Zerizalenm, bann lerwa ava anmenn kado pour ou.

³⁰ Menas Lezip, ki parey en zannimo sovaz dan lanmar! Menas kont bann nasyon ki parey en troupo toro ek bann zenn toro. Zot ava vin bes zot latet devan ou e ofer ou zot kado. Fer fannen bann pep ki kontan lager!

³¹ Bann dimoun enportan pou vini, sorti Lezip. Bann Etyopyen pou vin ver Bondye, lanmen leve anler.

³² Tou bann pep partou dan lemonn! Sant pour Bondye! Loue SENYER!

³³ Atraver lesyel lo son kales, i fer tande son lavwa pwisan.

³⁴ Proklanmen ki Bondye i pwisan; i gouvern Izrael; i montre son pwisans dan lesyel.

³⁵ Bondye i formidab dan son sanktyer. Li, Bondye Izrael, i donn son pep pouvwar ek lafors. Loue Bondye!