Psonm 66 - Labib An Kreol Seselwa

Kantik Louanz ek Remersiman

Pour sef lakoral. En san. En psonm.

¹ Tou bann zabitan later! Kriye e sant zot lazwa pour loue Bondye!

² Sant laglwar son non! Rann li glwar!

³ Dir Bondye: Tou sa ki ou fer i vreman formidab. Akoz ou pwisans, ou bann lennmi i kourbe devan ou.

⁴ Tou dimoun lo later i ador ou; zot sant an ou loner; zot sant an loner ou non.

⁵ Vin get tou sa ki Bondye in fer! Bann aksyon terib ki i'n akonpli i formidab pour bann zabitan later.

⁶ In fer lanmer vin later sek; dimoun ti travers larivyer apye. Alor, nou ti fer lafet.

⁷ Par son lafors, i gouvern pour touzour; i gard son lizye lo bann nasyon. Pa les bann rebel fer vantar.

⁸ Tou bann nasyon! Remersye nou Bondye. Fer antann zot louanz pour li!

⁹ I'n prezerv nou lavi. I pa'n les nou glise.

¹⁰ Mon Bondye! Ou'n teste nou. Ou'n pirifye nou parey larzan i ganny pirifye.

¹¹ Ou'n fer nou tonm dan en latrap; ou'n met bann fardo lo nou ledo.

¹² Ou'n les dimoun mont lo nou latet. Nou'n pas atraver dife ek delo; me ou'n fer nou sorti, pour donn nou labondans.

¹³ Mon pou antre dan ou sanktyer avek bann sakrifis konplet. Mon pou gard bann ve ki mon ti'n fer.

¹⁴ Mon pou akonpli promes ki mon ti fer ler mon ti dan maler.

¹⁵ Mon pou ofer ou zannimo gra koman sakrifis konplet. Loder lafimen bann mouton mal pou mont kot ou. Mon pou ofer sakrifis toro ek mouton.

¹⁶ Zot tou ki ador Bondye! Vini. Vin ekoute. Mon ava rakont zot sa ki i'n fer pour mwan.

¹⁷ Avek mon labous mon ti apel li. Mon ti demann li son sekour e mon ti loue li.

¹⁸ Si mon ti'n gard mesanste dan mon leker, SENYER pa ti pou ekout mwan.

¹⁹ Me Bondye in ekout mwan; in antann mon lapriyer.

²⁰ Mon loue Bondye! I pa'n rezet mon lapriyer, ni retir son fidelite anver mwan.