Psonm 65 - Labib An Kreol Seselwa

Kantik Louanz ek Remersiman

En psonm David. En kantik. Pour sef lakoral.

¹ Mon Bondye! Ou ki dan Zerizalenm, ou merit ganny loue. Nou devre gard nou promes anver ou.

² Akoz ou ekout nou lapriyer, tou zabitan later ava tourn ver ou.

³ Pwa mon fot i tro lour pour mwan. Ou pou pardonn tou nou pese.

⁴ I byennere sa enn ki ou swazir pour anmenn viv dan ou sanktyer! Nou pou rasazye avek tou bann bon keksoz ki sorti kot ou dan ou tanp sakre.

⁵ Mon Bondye, nou Sover! Ou bann gran mervey i delivrans pour nou. Ou menm lespwar bann zabitan later e atraver lanmer, ziska bann zil lwenten.

⁶ Par ou lafors, ou'n plas bann montanny. Ou ranpli avek pwisans.

⁷ Ou kalme tapaz lanmer; tapaz son bann laroul ek gronnyman bann nasyon.

⁸ Zabitan dan bout later i dan lafreyer par ou bann siny. Ou fer bann pei dan Les e dan Was kriy zot lazwa.

⁹ Ou pran swen avek later. Ou fer lapli tonbe, ou anrisi li e rann li fertil. Larivyer Bondye i plen avek delo; ou donn bon rekolt bann zabitan later. La koman ou prepar later:

¹⁰ Ou met delo dan rigol, delo pour irigasyon. Ou kas bann boul later, ou fer zot mou. Ou aroz li avek lapli e fer pouse bann plant.

¹¹ Ou kouronn lannen avek en kantite byenfe. Kot ou pase i annan labondans.

¹² Bann landrwa ki ti sek i donn bon rekolt; bann kolin i ranpli avek lazwa.

¹³ Laplenn i ranpli avek bann troupo. Bann vale i kouver avek dible. Zot kriye e sante dan lazwa.