Psonm 63 - Labib An Kreol Seselwa

Dezir pour War Bondye

En psonm David ler i ti dan dezer Zida.

¹ Mon Bondye! Ou menm mon Bondye. Mon pe rod ou koman soley i leve. Mon swaf, mon anvi ou mon Bondye. Mon lekor i bezwen ou parey en later ki'n sek, san delo.

² Alor, mon'n kontanple ou dan sanktyer pour mwan admir ou pwisans ek ou laglwar.

³ Ou fidelite i vo plis ki lavi; mon labous pou proklanm ou louanz.

⁴ Mon pou kontinyen remersye ou tou mon lavi; mon pou lev mon lanmen pour glorifye ou non.

⁵ Mon pou rasazye parey avek bann pli bon pla; mon pou selebre e sant louanz avek lazwa.

⁶ Ler mon alonze lo mon lili, mon mazin ou. Mon pas tou lannwit mazin ou,

⁷ akoz ou'n vin sekour mwan. Mon dan lazwa dan lonbraz ou lezel.

⁸ Mon atase avek ou; ou lanmen pwisan i soutenir mwan.

⁹ Bann dimoun ki pe rod touy mwan pou desann dan profonder lemonn lanmor.

¹⁰ Zot pou ganny masakre. Zot ava ganny devore par sakal.

¹¹ Lerwa pou dan lazwa, akoz Bondye in donn li laviktwar. Tou dimoun ki pret serman lo non Bondye pou loue li. Labous bann manter pou reste fermen.