Psonm 59 - Labib An Kreol Seselwa

Lapriyer pour Demann Delivrans

En poenm David, ler Sail ti donn lord vey lo son lakaz pour kapab touy li. Pour sef lakoral.

¹ Mon Bondye! Delivre mwan dan lanmen mon bann lennmi. Protez mwan kont sa bann ki atak mwan.

² Delivre mwan kont sa bann malfeter. Sov mwan kont sa bann kriminel.

³ Gete! Zot pe vey mwan, pre pour zot touy mwan. Bann zonm pe fer konplo kont mwan. Pourtan SENYER, mon pa'n fer nanryen mal, ni komet okenn pese.

⁴ San ki mon'n komet okenn fot, zot taye e zot met zot pare pour atak mwan. Leve! Vin kot mwan e ou ava war ou menm.

⁵ Ou SENYER, Bondye liniver, ou menm Bondye Izrael! Leve pour pini tou bann nasyon. Pa pran pitye pour okenn sa bann tret.

⁶ Tou le swar zot retournen, zot irle parey lisyen e zot parwaze dan lavil.

⁷ Zot labous i deborde avek parol menas. Zot dir: Lekel ki pou antann nou?

⁸ Me ou riy zot SENYER; ou pa pran ka avek sa bann nasyon.

⁹ Mon annan konfyans dan ou, mon lafors, akoz ou mon Bondye, ou mon protekter.

¹⁰ Dan son fidelite, mon Bondye ava vin kot mwan. Mon Bondye ava fer mwan war laviktwar lo mon bann lennmi.

¹¹ Pa touy zot, sinon mon pep ava oubliye. Par ou lafors, fer zot tranble e fer zot tonbe. SENYER! Nou boukliye.

¹² Koman zot ouver labous, pese ki sorti lo zot lalev. Fer zot tonm dan latrap zot lorgey. Pour tou sa bann malediksyon ek mansonz,

¹³ detri zot dan ou lakoler. Detri zot ziska ki zot disparet. Alor tou dimoun ava konnen ki Bondye i gouvern Izrael ek later antye.

¹⁴ Tou le swar zot retournen, zot irle parey lisyen e zot parwaze dan lavil.

¹⁵ Zot rodaye partou pour ganny manze e zot gronnyen si zot pa ganny ase.

¹⁶ Mwan, mon pou proklanm ou lafors. Tou le bomaten, mon pou kriy byen for ou fidelite. Ou en protekter pour mwan; ou en labri dan letan mon maler.

¹⁷ Ou ki mon lafors, mon pou sant avek lazwa pour ou. Ou mon Bondye, ou mon protekter. Ou mon Bondye ki fidel anver mwan.