Psonm 50 - Labib An Kreol Seselwa

Vre Ladorasyon

Sa psonm i proklanmen ki Bondye i ziz Izrael e lemonn antye. En psonm sorti kot Asaf.

¹ Bondye Toupwisan, SENYER Bondye in koze e i konvok later antye depi en bout later ziska lot.

² Depi Zerizalenm, sa lavil avek en labote parfe, SENYER i aparet dan lalimyer.

³ Nou Bondye pe vini, i pa pe gard silans. Devan li, en dife ki devor tou. Otour li, i annan en tanpet vyolan.

⁴ I kriy ver lesyel lao e ver later pou ziz son pep:

⁵ Rasanble mon bann fidel ki'n fer en lalyans avek mwan par en sakrifis!

⁶ Lesyel i proklanmen ki Bondye i zis. Bondye i sel ziz!

⁷ Mon pep! Ekout mwan. Mon annan sa pour dir ou: Izrael! Mon pou temwanny kont ou. Mwan Bondye, ki ou Bondye!

⁸ Mon pa akiz ou akoz ou bann sakrifis; ou'n touzour ofer mwan bann sakrifis konplet.

⁹ Mon pa bezwen en toro ki sorti kot ou, ni kabri ki sorti dan ou troupo.

¹⁰ Annefe, tou bann zannimo lafore ek bann troupo ki dan laplenn lo montanny i pour mwan.

¹¹ Mon konn tou bann zwazo dan lesyel. Tou kreatir lo later i pour mwan.

¹² Si mon lafen, mon pa pou bezwen fer ou konnen, akoz later ek tou sa ki i annan dan lemonn i pour mwan.

¹³ Eski mon pou manz lavyann toro? Eski mon pou bwar disan kabri?

¹⁴ Ofer Bondye en sakrifis remersiman e gard tou ou bann promes ki ou'n fer anver Bondye Treo.

¹⁵ Apel mwan zour ou dan maler; mon ava delivre ou e ou ava sant mon laglwar.

¹⁶ Me Bondye i demann sa malfeter: Akfer ou repet mon bann komannman e gard mon lalyans lo ou labous,

¹⁷ ou ki pa aksepte ganny korize e ki rezet mon parol?

¹⁸ Ou fer zanmi avek en voler ki ou rankontre; ou frekant dimoun ki komet adilter.

¹⁹ Ou labous i koz zis dimal, ou lalang i koz mansonz.

²⁰ Ou asize e koz kont ou frer; ou sali repitasyon zanfan ou prop manman.

²¹ Tousala, ou'n fer e oule mon gard silans? Ou ti krwar mon ti parey ou? Aprezan mon denons ou, e mon pou akiz ou anfas.

²² Zot ki'n oubliy Bondye! Fer byen atansyon. Otreman, mon pou desir zot e personn pa pour vin delivre zot.

²³ Sa enn ki anmenn mwan son lofrann, i onor mwan. Sa enn ki mars dan bon semen, mon pou fer li war delivrans Bondye.