Psonm 49 - Labib An Kreol Seselwa

Konfyans dan Larises I En Betiz

Pour sef lakoral. En psonm sorti kot fraternite Kore.

¹ Tou bann pep, ekoute! Tou bann zabitan later, port atansyon!

² Dimoun senp koman dimoun enportan; ris koman pov.

³ Mon labous pou pronons parol lasazes; mon leker pou medit lo keksoz profon.

⁴ Mon'n ekout byen en proverb; mon pou donn leksplikasyon pandan ki mon zwe lanmizik.

⁵ Akoz mon bezwen trakase dan letan maler, kan mon bann lennmi in antour mwan?

⁶ Zot met zot konfyans dan zot larzan; zot fer vantar avek zot gran larises.

⁷ Personn pa kapab reaste lavi, ni pey Bondye en ranson pour li.

⁸ Annefe, lavi napa pri. Sa ki ou peye, pa pou zanmen ase

⁹ pour permet li viv pour touzour e anpes li al dan latonm.

¹⁰ Me nou remarke, dimoun saz i mor avek bann fou ek bann brit. Zot kit zot larzan pour lezot.

¹¹ Zot ti krwar posed zot propriyete pour touzour. Me zot latonm ki vin zot demer pour touzour, zot abitasyon dan tou zenerasyon.

¹² Tou son bann larises pa kapab gard li vivan. I mor parey en zannimo.

¹³ La sa ki arive avek tou dimoun ki annan lafoli grander, ki kontan ekout zot menm koze:

¹⁴ Parey mouton, zot ganny destinen pour lanmor. Lanmor i zot berze. Zot desann drwat dan latonm. Apre sa, dimoun ki zis, i kraz zot anba lipye; zot perdi zot laform. Lemonn lanmor i vin zot demer.

¹⁵ Me Bondye pou sov mon lavi dan pouvwar lanmor, akoz i pou delivre mwan.

¹⁶ Pa bezwen enkyet si dimoun i vin ris, si zot larises i kontinyen grandi.

¹⁷ Kan zot mor, zot pa anmenn nanryen avek zot; zot larises pa swiv zot dan latonm.

¹⁸ Ler zot ti vivan, zot ti vant zot lekor e dimoun ti felisit zot pour zot byennet.

¹⁹ Zot pou al rezwenn zot bann zanset ki pa pou zanmen revwar lalimyer.

²⁰ Sa enn ki annan larises, me ki napa lentelizans, pa konpran ki i pou mor parey zannimo.