Psonm 46 - Labib An Kreol Seselwa

Bondye I avek Nou

Pour sef lakoral. En sanson sorti kot fraternite Kore, dapre Alamot.

¹ Bondye i pour nou en labri e en sekour. I touzour avek nou dan letan maler.

² Pour sa rezon, nanryen pa pou fer nou per: Menm si i annan tranblemandter; menm si montanny i tranble dan milye lanmer;

³ menm si bann laroul i gronnyen e kimen e bann kolin i sekwe avek vyolans.

⁴ I annan en larivyer ki anmenn lazwa dan lavil Bondye, kot son sanktyer Treo i ete.

⁵ Bondye i dan milye lavil; i pa pou ganny detri. Koman soley i leve, Bondye i la pour protez li.

⁶ Bann nasyon i dan lafreyer; bann rwayonm i tranble. Ler Bondye i fer tande son lavwa, later i fonn.

⁷ SENYER liniver i avek nou; Bondye Zakob i nou labri.

⁸ Vini! Get sa ki SENYER in fer. Get bann ravaz ki i'n fer lo later.

⁹ I fer lager arete partou lo later; i kas bann fles, i detri bann lans; i met dife dan bann boukliye.

¹⁰ Arete! Konnen ki mwan menm Bondye. Mon domin lo tou nasyon; mon domin lo later antye.

¹¹ SENYER liniver i avek nou; Bondye Zakob i nou labri.