Psonm 42 - Labib An Kreol Seselwa

Lapriyer En Egzile

Pour sef lakoral. En poenm sorti dan fraternite Kore.

¹ Mon soupir apre ou, mon Bondye, parey en serf i rod en sours delo.

² Mon swaf pour Bondye, mon Bondye ki vivan. Kan eski mon pou kapab prezant mwan devan ou prezans?

³ Lizour koman aswar, mon larm i mon sel nouritir. Zot demann mwan: Oli ou Bondye?

⁴ Mon gard en bon souvenir dan mon leker: Mon rapel byen, mon ti pe marse avek lafoul. Mon ti pe mars devan laprosesyon ziska tanp Bondye. Ansanm avek lafoul dan lafet, nou ti sant bann kantik remersiman.

⁵ Akoz mon dekouraze? Akoz mon plenny lo mon sor? Met ou konfyans dan Bondye! Mon pou loue li ankor, li, mon Sover.

⁶ Dan mon latristes, mon mazin ou, depi dan pei Zourden ek montanny Hermon ek montanny Mitsear.

⁷ Ou fer ronfle bann toran; en laroul i swiv en lot laroul; ou fer zot kraz mwan. Zot tou, zot in pas lo mwan.

⁸ Lizour, SENYER i montre mwan son fidelite. Aswar, mon sant pour li, mon priy Bondye ki donn mwan lavi.

⁹ Mon demann Bondye, mon Ros protekter: Akoz ou'n oubliy mwan? Akoz mon bezwen reste dan latristes e les mon bann lennmi kraz mwan?

¹⁰ Zot bann lensilt i kraz mwan ziska dan mon lezo. Tou le zour zot demann mwan: Oli ou Bondye?

¹¹ Akoz mon dekouraze? Akoz mon plenny lo mon sor? Met ou konfyans dan Bondye! Loue li ankor, i mon Sover e mon Bondye!