Psonm 41 - Labib An Kreol Seselwa

Lapriyer dan Letan Maladi

En psonm David. Pour sef lakoral.

¹ I byennere sa enn ki port atansyon lo bann ki pov! SENYER pou delivre li kan i dan maler.

² SENYER i protez li, i gard li vivan e rann li ere lo later. I pa pou les li tonm dan lanmen son bann lennmi.

³ SENYER i soutenir li kan i malad. I geri li dan tou son maladi.

⁴ Mon dir: SENYER! Pran pitye pour mwan; geri mwan akoz mon'n fer pese kont ou.

⁵ Mon bann lennmi i dir dimal lo mwan. Zot demande kan mon pou mor e mon non ava disparet.

⁶ Ler zot vin war mwan, zot rakont zis mansonz. Zot leker i ranpli avek mesanste ki zot mars avek, de ki zot sorti kot mwan.

⁷ Zot tou ki pa kontan mwan, zot koz kont mwan; zot mazin tou kalite maler lo mwan:

⁸ In atrap en maladi ki napa gerizon; i pa pou leve, i pou mor.

⁹ Menm mon meyer zanmi avek ki mon ti fer konfyans, ki'n partaz mon repa, in vir kont mwan.

¹⁰ Me ou SENYER! Par pitye, geri mwan; lev mwan e mon ava fer zot peye.

¹¹ Mon ava rekonnet ou lanmour pour mwan, kan mon bann lennmi ava aret kriy laviktwar lo mwan.

¹² Ou'n sekour mwan, ou'n redonn mwan lasante e ou'n gard mwan dan ou prezans pour touzour.

¹³ Loue SENYER, Bondye Izrael pour touzour! Amenn! Amenn!