Psonm 40 - Labib An Kreol Seselwa

En Kantik pour Loue Senyer

En psonm David. Pour sef lakoral.

¹ Avek pasyans, mon'n esper led SENYER. I'n port atansyon lo mwan e i'n antann mon lapel.

² I'n tir mwan dan dezespwar lanmor, dan labou san fon. I'n met mwan debout lo en ros; i'n fer mon lipye vin for.

³ I'n met en nouvo kantik lo mon lalev; en kantik pour loue nou Bondye. Bokou dimoun ki pou temwen, pou annan respe pour SENYER e met zot konfyans dan li.

⁴ I byennere sa enn ki'n met son konfyans dan SENYER! I pa tourn ver bann arogan ni ver bann ki swiv bann fo bondye.

⁵ SENYER mon Bondye! Ou'n fer en kantite keksoz merveye pour nou; napa personn parey ou. Mon anvi fer konnen ou bann mervey. Me i annan tro bokou pou rakonte.

⁶ Ou'n donn mwan zorey pour mwan tande: Ou pa oule ni sakrifis, ni lofrann. Ou pa aksepte okenn sakrifis konplet, ni okenn sakrifis pour pardon pese.

⁷ Alor, mon ti dir: Mon vin ver ou. Sa liv in ekri lo mon size.

⁸ Mon Bondye! Mon oule fer ou lavolonte. Ou lalwa in grave dan fon mon leker.

⁹ Devan lasanble, mon anons nouvel ou delivrans. Ou konnen ou menm SENYER: Mon pa'n gard silans.

¹⁰ Mon pa'n kasyet ou lazistis dan fon mon leker; mon'n fer proklanm ou fidelite ek ou delivrans pour mwan. Mon pa'n kasyet ou fidelite ek ou lanmour devan lasanble.

¹¹ SENYER! Pa refiz mwan ou konpasyon. Ou lanmour ek ou fidelite i touzour protez mwan.

Lapriyer pour Demann Led

¹² En kantite maler in serkle mwan partou; i tro bokou pour konte. Mon bann pese in retonm lo mwan; zot anpes mwan war kler; zot plis ki seve lo mon latet e mon'n perdi kouraz.

¹³ SENYER! Delivre mwan. Pa tarde pour sekour mwan.

¹⁴ Fer onte bann ki esey touy mwan. Fer rekile e met dan konfizyon tou bann ki rod mon maler.

¹⁵ Ferm labous sa bann ki riy mwan e monk mwan dan laont.

¹⁶ Me ki lazwa sa bann ki rod ou i deborde akoz ou! Zot ki kontan ou koman zot Sover, pa pou arete proklanmen, “SENYER i gran!”

¹⁷ Mwan, mon en pov malere; me SENYER i mazin mwan. SENYER! Ou menm mon sekour, mon liberater. Mon Bondye pa tarde!