Psonm 4 - Labib An Kreol Seselwa

Lapriyer Aswar pour Demann Lasistans Senyer

Psonm David avek lakonpannyman enstrimantal.

¹ Mon Bondye ki zis! Reponn mwan ler mon kriy ver ou. Soulaz mwan ler mon dan detres. Pran pitye pour mwan, ekout mon lapriyer.

² Zot bann zonm! Pandan konbyen letan ankor zot pou abes mon loner? Pandan konbyen letan ankor zot pou dir bann parol vid ek mansonz?

³ Pa oubliye ki SENYER in met apar sa enn ki reste fidel anver li. SENYER i antann mwan ler mon apel li.

⁴ Tranble dan ou leker, pa fer pese. Lo ou lili, medit dan ou leker e reste trankil.

⁵ Ofer bann sakrifis ki byen; met ou konfyans dan SENYER.

⁶ Bokou pe dir: Lekel ki pou montre nou sa ki byen? SENYER! Fer leve lalimyer ou lafas lo nou.

⁷ Ou'n met lazwa dan mon leker, plis ki dan letan kan dible ek diven ti annabondans.

⁸ Mon pou alonze e dormi anpe, akoz ou SENYER, ou gard mwan an sekirite.