Psonm 39 - Labib An Kreol Seselwa

Konfesyon En Dimoun dan Douler

Psonm David. Pour sef lakoral: Pour Yedoutoun.

¹ Mon ti dir: Mon pou vey mon konportman, pour mwan pa fer pese avek mon lalang. Mon pou met en bayon lo mon labous tan ki i annan malfeter devan mwan.

² Mon ti gard silans; mon silans pa ti abouti dan nanryen. Mon soufrans ti ensiportab.

³ Avek sak soupir, en dife ti brile dan mon leker. Alor, mon ti les mon labous koze.

⁴ SENYER! Fer mwan konn lafen mon lavi. Konbyen letan mon pou viv, pour mwan realize ki mon lavi i kourt.

⁵ Letan ki ou'n donn mwan pour viv i en pe plis ki larzer en lanmen. Devan ou, sa i nanryen ditou: Lavi en imen i zis en respirasyon.

⁶ I ale vini, parey en lonbraz; i fatig li en kantite; me sa i zis divan. I akimil larises san konnen lekel ki pou profite.

⁷ Aprezan SENYER! Ki i annan ankor pour espere? Tou mon lespwar i dan ou.

⁸ Delivre mwan dan tou mon bann pese. Pa les bann fou riy mwan.

⁹ Aprezan, mon gard silans. Mon pa pou ouver mon labous, akoz ou ki'n met mwan dan sa leta.

¹⁰ Aret ou bann kou lo mwan; mon afebli par ou bann kalot.

¹¹ Ou koriz en imen e ou pini li pour son bann fot; parey en lever, ou ronz sa ki i pli kontan. Nou konnen ki tou et imen i zis divan.

¹² SENYER! Ekout mon lapriyer. Mon kriy ou. Ekout mwan! Pa reste endiferan devan mon larm. Mon en pasan kot ou; en etranze parey tou mon bann zanset.

¹³ Donn mwan en letan repo. Les mwan trankil en moman pour mwan reganny mon sourir avan mon disparet pour touzour.