Psonm 36 - Labib An Kreol Seselwa

Mesanste Dimoun

Psonm David, serviter SENYER. Pour sef lakoral.

¹ Dan fon mon leker, mon mazin mesanste zonm: Dan fon son leker, i napa respe pour Bondye.

² I flat son lekor ki i pa rekonnet son pese. I mazinen ki Bondye pa pou war son pese e kondann li.

³ Dan son labous i sorti zis mansonz ek frod; i nepli fer sa ki byen, sa ki saz.

⁴ I prepar son bann move kou depi dan son lili. I antete swiv move semen; i pa fer nanryen ki byen.

Bondye I Bon

⁵ SENYER! Ou fidelite i tous lesyel. Ou lanmour i ariv ziska dan nyaz.

⁶ Ou lazistis i depas bann montanny; ou bann zizman i desann ziska dan profonder lanmer. SENYER! Ou sov bann et imen ek bann zannimo.

⁷ SENYER! Ou fidelite i tre presye. Tou imen i vin abrit dan lonbraz ou lezel.

⁸ Kot ou, manze i annabondans; ou fer zot bwar dan larivyer ou labonte.

⁹ Ou menm sours lavi; dan ou lalimyer, nou war lalimyer.

¹⁰ Kontinyen montre ou fidelite anver sa bann ki konn ou lazistis, anver sa bann ki annan leker drwat.

¹¹ Pa les sa bann arogan kraz mwan anba zot lipye. Pa les lanmen bann malfeter domin mwan.

¹² La bann malfeter in tonbe. Zot in ganny ranverse e zot pa kapab leve.