Psonm 35 - Labib An Kreol Seselwa

Lapriyer pour Demann Sekour

Psonm David.

¹ SENYER! Akiz sa bann ki akiz mwan. Atak sa bann ki atak mwan.

² Pran ou bann boukliye! Leve! Vin sekour mwan.

³ Pran ou lans ek ou sagay kont sa bann ki pe persekit mwan. Dir mwan: Mwan menm ou sover.

⁴ Kouver sa bann ki oule touy mwan avek laont ek dezoner. Fer sa bann ki pe fer konplo kont mwan rekile e kanmi.

⁵ Lanz SENYER ava sas zot. Zot ava vin koman lapay ki anvole dan divan.

⁶ Lanz SENYER ava pourswiv zot. Zot semen pou dan fernwanr e zot ava glise.

⁷ San okenn rezon, zot in met en latrap kont mwan. San okenn rezon, zot in fouy en trou pour mwan.

⁸ Fer en gran maler tonm lo zot par sirpriz. Fer zot tonm dan zot prop latrap e zot ava ganny detri.

⁹ Alor, mwan, mon pou dan lazwa akoz SENYER. Mon pou rezoui akoz in delivre mwan.

¹⁰ Dan pli profon mon leker, mon pou dir: SENYER! Napa personn parey ou! Ou protez sa enn ki feb, kont sa enn ki for. Ou protez sa enn ki pov e ki ganny imilye, kont sa bann ki eksplwat li.

¹¹ Bann fo temwen i leve. Zot kestyonn mwan lo sa ki mon pa konnen.

¹² Zot rann mwan dimal pour dibyen; mon'n ganny abandonnen.

¹³ Kan zot ti malad, mon ti met lenz dey. Par senpati, mon ti fer en zenn e mon ti priye.

¹⁴ Mon ti fer sa konmsi ti pour en zanmi oubyen en frer. Mon ti sagren, kraze par lafatig, konmsi mon ti'n perdi mon prop manman.

¹⁵ Me ler mwan mon ti dan maler, zot ti antour mwan e zot ti riy mwan. Bann bandi ki mon pa ti rekonnet pa ti arete maltret mwan.

¹⁶ Zot ti kontinyen monk mwan e zot ti grens zot ledan kont mwan.

¹⁷ Ankor konbyen letan, SENYER, ou pou zis gete? Delivre mwan kont sa bann malfeter! Aras mwan dan grif sa bann lyon!

¹⁸ Alor, mon ava dir ou mersi devan gran lasanble. Mon ava loue ou dan milye sa gran lafoul.

¹⁹ Pa les mon bann lennmi riy mwan. Pa les sa bann ki ay mwan san rezon get mwan avek mepri.

²⁰ Zanmen zot koz pour fer lape. O kontrer, zot envant en bann kalonmni kont bann zabitan trankil sa pei.

²¹ Zot ouver gran zot labous kont mwan. Zot dir: Nou'n war li avek nou prop lizye!

²² SENYER! Ou menm, ou'n war. Pa gard silans. SENYER! Pa reste lwen avek mwan.

²³ Leve SENYER! Vin defann mon drwa. Debout mon SENYER, mon Bondye! Vin defann mwan.

²⁴ SENYER mon Bondye! Ziz mwan dapre ou lazistis. Pa les mon bann lennmi riy mwan.

²⁵ Pa les zot dir ant zot: Nou'n ganny sa ki nou ti pe rode. Pa les zot dir: Nou'n debaras nou avek li!

²⁶ Fer sa bann ki kontan mon maler kanmi e onte. Ki sa bann ki montre larogans i ganny kouver avek laont ek dezoner.

²⁷ Me bann ki swete war lazistis dan mon faver, ava kriye dan lazwa e zot pa pou aret dir: SENYER i gran! I kontan boner son serviter.

²⁸ Alor, mon pou fer konnen koman ou fidel. Mon labous ava proklanm ou lazistis tou le zour.