Psonm 34 - Labib An Kreol Seselwa

Louanz lo Labonte Bondye

Psonm David.

¹ Mon pou touzour loue SENYER; mon labous pou touzour sant son louanz.

² Mon met mon lafyerte dan SENYER. Bann pov ava antann e zot ava dan lazwa!

³ Vin proklanm avek mwan grander SENYER! Ansanm, annou sant son non!

⁴ Mon ti apel SENYER e i ti reponn mwan. In delivre mwan dan tou mon lafreyer.

⁵ Sa enn ki lev son lizye ver li, lazwa i reyonnen lo son figir. Laont pa pou paret lo son figir.

⁶ Kan en malere i kriye, SENYER i antann li. I delivre li dan tou son detres.

⁷ Lanz SENYER i kanp otour sa bann ki annan respe pour SENYER. I delivre zot dan tou danze.

⁸ Goute e gete koman SENYER i bon! Sa enn ki pran li pour son labri i vreman ere.

⁹ Zot son bann sen, annan respe pour SENYER! Sa enn ki annan respe pour li, pa mank nanryen.

¹⁰ Bann zenn lyon i konnen kisisa bezwen ek lafen. Me sa enn ki obei SENYER pa mank nanryen.

¹¹ Mon bann zanfan! Vini. Ekout mwan. Mon ava ansenny zot respe pour SENYER.

¹² Eski ou anvi zouir lavi? Eski ou anvi war bann zour ere?

¹³ Alor gard ou lalang kont lemal e vey ou labous kont mansonz.

¹⁴ Aret fer sa ki mal, pratik sa ki byen; rod lape e met li an pratik.

¹⁵ Lizye SENYER i fikse lo bann zis. Son zorey i ouver pour ekout zot ler zot kriye.

¹⁶ SENYER i tourn kont bann malfeter pour fer disparet zot non lo later.

¹⁷ Kan son zanfan i apel li, SENYER i antann li. I delivre li dan tou son traka.

¹⁸ SENYER i pros avek sa enn ki'n dekouraze. I sov sa enn ki'n perdi tou lespwar.

¹⁹ En zonm ki zis i tonm dan bokou maler. Me SENYER i touzour delivre li.

²⁰ I vey lo tou son bann lezo; napa enn ki pou ganny kase.

²¹ Maler i anmenn lanmor bann malfeter. Lennmi bann ki fidel anver SENYER pou ganny pini.

²² SENYER i sov lavi son bann serviter. Sa enn ki met son konfyans dan li pa pou ganny pini.