Psonm 33 - Labib An Kreol Seselwa

Kantik Louanz

Psonm David.

¹ Zot ki zis! Sant an loner SENYER. Zot ki drwat! I bon pour zot loue li.

² Zwe lanmizik pour loue SENYER! Loue li lo laarp dis lakord!

³ Sant en nouvo kantik an son loner! Zwe byen zot lenstriman e kriye dan lazwa!

⁴ Parol SENYER i vre; i akonpli tou avek fidelite.

⁵ SENYER i kontan lazistis ek ladrwatir. Fidelite SENYER i ranpli later.

⁶ Lesyel ti ganny kree par parol SENYER. Par souf son labous, in fer lesyel ek tou bann zetwal.

⁷ In rasanble delo lanmer ansanm dan en sel plas. In met delo bann losean dan bann rezervwar.

⁸ Later antye i ador SENYER! Tou zabitan later i rann li omaz.

⁹ Koman in koze, later i egziste. Koman in donn lord, later in egziste.

¹⁰ SENYER i kas plan bann nasyon; i anpes zot realiz zot bann proze.

¹¹ Me bann plan SENYER i dire pour touzour. Son bann proze i reste pour leternite.

¹² I byennere sa nasyon ki annan SENYER koman son Bondye! I byennere sa pep ki SENYER in swazi pour son patrimwann!

¹³ Depi lesyel, SENYER i gete: I war tou dimoun.

¹⁴ Lo son tronn kot in asiz, i obzerv tou bann zabitan later.

¹⁵ Li menm ki'n form zot leker. Alor, i konn tou sa ki zot fer.

¹⁶ En lerwa pa ganny sove akoz i annan en larme pwisan. En solda pa ganny delivre par grander son lafors.

¹⁷ En seval pa kapab donn laviktwar; son gran lafors pa sov son kavalye.

¹⁸ Me SENYER i vey lo sa enn ki annan respe pour li; lo sa enn ki'n met son konfyans dan li,

¹⁹ pour delivre li dan lanmor e gard li vivan menm dan letan lafanmin.

²⁰ Nou'n met nou lespwar dan SENYER. Li menm ki nou lafors e nou protekter.

²¹ Nou'n met nou konfyans dan son non sen, i lazwa ki dan nou leker.

²² SENYER! Antour nou dan ou fidelite. Nou'n met nou lespwar dan ou.