Psonm 30 - Labib An Kreol Seselwa

Lapriyer Remersiman

Psonm David. En kantik pour dedikas tanp.

¹ SENYER! Mon proklanm ou grander. Ou pa'n les mon bann lennmi anmize lo mon depan.

² SENYER, mon Bondye! Mon ti kriy ver ou e ou'n geri mwan.

³ SENYER! Ou'n tir mwan dan lemonn lanmor. Ler mon ti pe tonm dan lafos, ou'n redonn mwan lavi.

⁴ Sant pour SENYER, zot son pep fidel! Loue SENYER, akoz son non i sen!

⁵ Son lakoler i dire zis pour en moman; me son labonte i pour touzour. Mon kapab plere tou lannwit; me ler lizour i fer, mon dan lazwa.

⁶ Mon ti krwar mon an sekirite. Alor mon ti dir: Zanmen mon pou ganny sekwe.

⁷ Dan ou labonte, SENYER, ou'n fer mwan solid parey en montanny; ou ti kasyet ou e mon ti per.

⁸ SENYER! Mon ti apel ou. SENYER! Mon ti sipliy ou:

⁹ Ki lentere ou annan dan mon lanmor, ler mon desann dan lafos? Eski dimoun mor i kapab loue ou? Eski zot kapab rakont ou fidelite?

¹⁰ SENYER! Ekout mwan. Pran pitye pour mwan. SENYER! Vin sekour mwan.

¹¹ Ou'n sanz mon lamantasyon an ladans. Ou'n ranplas mon lenz dey par en lenz lafet.

¹² Alor, mon pou sante e mon pa pou gard silans. SENYER, mon Bondye! Mon pou touzour loue ou.