Psonm 3 - Labib An Kreol Seselwa

Lapriyer Bomaten pour Demann Led

Psonm David ler i ti sove devan son garson Absalon.

¹ SENYER! Mon annan bokou lennmi. Bokou pe leve kont mwan.

² Bokou pe dir lo mwan: Bondye pa pou delivre li.

³ Me ou, SENYER, ou en boukliye protekter pour mwan; ou mon loner e ou fer mwan fyer.

⁴ Mon kriy for ver SENYER; depi son montanny sen i reponn mwan.

⁵ Mon alonze, mon dormi; apre mon leve. SENYER i touzour la, akote mwan.

⁶ Mon pa per menm si plizyer milye dimoun i antour mwan lo tou kote.

⁷ Leve SENYER! Mon Bondye! Sov mwan. Ou kalot mon bann lennmi lo zot lazou; ou kas ledan mon bann malfeter.

⁸ SENYER! Delivrans i dan ou lanmen. Devers ou benediksyon lo ou pep.