Psonm 29 - Labib An Kreol Seselwa

Lavwa Senyer dan Tanpet

Psonm David.

¹ Loue SENYER, zot bann garson Bondye! Proklanm son laglwar ek son pwisans.

² Proklanm gran non SENYER. Prostern devan prezans SENYER ler i manifeste son sentete.

³ Dan son mazeste, SENYER Bondye i fer tande son lavwa lo delo. Son lavwa i parey loraz, i rezonnen lo bann losean.

⁴ Lavwa SENYER i rezonn avek gran pwisans. Lavwa SENYER i ranpli avek mazeste.

⁵ Lavwa SENYER i kas bann pye sed. SENYER i kraz bann pye sed Liban.

⁶ I fer Liban sote parey en zenn bef e montanny Hermon parey en zenn toro sovaz.

⁷ Lavwa SENYER i fer zekler.

⁸ Lavwa SENYER i fer dezer tranble. SENYER i fer tranble dezer Kades.

⁹ Lavwa SENYER i sekwe bann gran pye dibwa e depouy lafore. Dan son tanp, tou dimoun i kriye: Glwar!

¹⁰ SENYER i lo son tronn par lao delo. SENYER i lerwa pour touzour.

¹¹ SENYER pou donn son pep lafors. SENYER pou beni son pep e donn li lape.