Psonm 28 - Labib An Kreol Seselwa

Lapriyer pour Demann Sekour

Psonm David.

¹ SENYER, mon apel ou! Mon Ros protekter, pa refize ekout mwan. Si ou pa reponn mwan, mon pou parey bann ki desann dan latonm.

² Ekout mon siplikasyon kan mon kriy ver ou. Mon lev mon lanmen ver ou, dan ou sanktyer sen.

³ Pa trenn mwan ansanm avek bann malfeter, ni avek bann ki fer sa ki mal, ki koz lape avek zot vwazen, me zot leker i ranpli avek mesanste.

⁴ Fer zot peye pour sa ki zot in fer e dapre zot krim. Tret zot parey zot in tret lezot. Donn zot sa ki zot merite.

⁵ Zot pa rekonnet travay SENYER ni sa ki son lanmen in fer. Alor, i pou detri zot e zot pa pou zanmen releve.

⁶ Mon loue SENYER akoz in ekout mon siplikasyon.

⁷ SENYER i mon lafors, i protez mwan. Mon met mon konfyans dan li, e i vin sekour mwan. Mon pou loue li avek bann kantik.

⁸ SENYER i lafors son pep; i defann li e i sov sa enn ki i'n konsakre.

⁹ Sov ou pep SENYER! Beni ou pep. Vin son berze! Vey lo li pour touzour.