Psonm 27 - Labib An Kreol Seselwa

Lapriyer pour Loue Bondye

Psonm David.

¹ SENYER i mon lalimyer e mon sover. Lekel ki mon pou per? SENYER i mon protekter kont tou danze. Mon pa pou zanmen per.

² Si bann malfeter i atak mwan pour detri mwan, se zot menm mon bann ladverser e mon bann lennmi ki tranble e tonbe.

³ Menm si en larme i vin atak mwan, mon pa pou per. Menm si en lager i ganny deklare kont mwan, mon pou gard mon konfyans.

⁴ Mon'n demann SENYER en sel keksoz: Reste dan tanp SENYER tou mon lavi, pour admir labote SENYER e kontanple li dan son tanp.

⁵ Dan letan maler, i pou gard mwan anba son twa; i pou kasyet mwan anba son latant; i pou met mwan an sekirite lo en gro ros.

⁶ La anler, mon pou ganny laviktwar lo mon bann lennmi ki antour mwan. Mon pou kapab ofer bann sakrifis dan son tanp, avek laklamasyon e dan lazwa. Mon pou sante, mon pou zwe lanmizik pour SENYER.

⁷ SENYER! Ekout mwan ler mon apel ou. Dan ou bonte, reponn mwan.

⁸ Mon mazin sa ki ou'n dir: Rod SENYER. Alor SENYER! Mon pe tourn ver ou.

⁹ Pa kasyet ou vizaz; ou'n touzour ed mwan. Pa rezet mwan ou serviter, avek lakoler. Ou ki'n delivre mwan, pa rezet mwan, pa abandonn mwan. Ou Bondye ki delivre mwan.

¹⁰ Menm si mon papa ek mon manman i abandonn mwan, SENYER pou resevwar mwan.

¹¹ SENYER! Montre mwan ou semen. Akoz mon bann lennmi, kondwir mwan lo en semen san danze.

¹² Pa les mwan tonm dan lanmen mon bann ladverser, akoz bann fo temwen in leve kont mwan; zot respir lavyolans.

¹³ Mon sir ki mon pou war labonte SENYER lo sa later kot nou pe viv.

¹⁴ Met ou lespwar dan SENYER; reste for, repran kouraz. Met ou lespwar dan SENYER.