Psonm 26 - Labib An Kreol Seselwa

Lapriyer En Inosan

Psonm David.

¹ SENYER! Deklar mwan inosan. Mon'n anmenn en lavi san repros. Mon'n met mon konfyans dan SENYER. Mon pa pou tonbe.

² Teste mwan, SENYER! Egzamin mwan, mon lespri ek mon leker.

³ Ou fidelite i devan mwan, mon mars avek fidelite anver ou.

⁴ Mon pa frekant dimoun ki tronp lezot; mon pa'n antre dan lakaz dimoun ipokrit.

⁵ Mon deteste frekant bann ki fer sa ki mal e mon pa asiz avek bann malfeter.

⁶ Mon lav mon lanmen pour montre mon linosans e mon fer letour ou lotel, SENYER.

⁷ Mon sant en kantik remersiman pour tou bann mervey ki ou'n fer pour mwan.

⁸ SENYER! Mon kontan lakaz kot ou reste; e landrwa kot laglwar ou prezans i ete.

⁹ Pa balye mwan ansanm avek bann peser; pa fer mwan mor parey bann kriminel.

¹⁰ Zot lanmen i sal avek bann aksyon degoutan. Zot lanmen drwat i pare pour aksepte gous.

¹¹ Mon'n anmenn en lavi san repros. SENYER! Delivre mwan. Pran pitye pour mwan.

¹² Mon debout ferm lo mon lipye. Mon pou loue SENYER dan bann gran lasanble.