Psonm 24 - Labib An Kreol Seselwa

Bondye I en Gran Lerwa

Psonm David.

¹ Later avek tou son larises, lemonn avek tou son bann zabitan i pour SENYER.

² I ti etabli son fondasyon dan lanmer; i ti fikse li dan profonder bann losean.

³ Lekel ki kapab mont lo montanny SENYER? Lekel ki pou kapab tenir debout dan son sanktyer?

⁴ Sa enn ki lanmen i prop e leker i pir; ki pa aksepte mansonz e ki pa fer fo promes pour tronp dimoun.

⁵ I pou ganny benediksyon SENYER e rekonnet koman zis devan Bondye son Sover.

⁶ Konmsa menm zot pou ete, bann ki rod Bondye e tourn ver Bondye Zakob.

⁷ Bann laport! Ouver gran zot batan. Ouver gran laport antik. Les sa gran lerwa antre.

⁸ Lekel sa gran lerwa? Sa i SENYER ki for e pwisan. Li menm SENYER ki viktorye dan konba.

⁹ Ouver gran laport! Ouver gran laport antik, pour les gran lerwa antre.

¹⁰ Lekel sa gran lerwa? Li menm SENYER liniver. Li menm sa gran lerwa.