Psonm 22 - Labib An Kreol Seselwa

Soufrans ek Lespwar En Bon Dimoun

Psonm David. Pour sef lakoral. Sante lo en ler kouran.

¹ Mon Bondye! Mon Bondye! Akoz ou'n abandonn mwan? Akoz ou reste sitan lwen avek mwan? Akoz ou pa ekout mon lapel?

² Mon Bondye! Mon Bondye! Lizour mon apel ou, me ou pa reponn. Dan lannwit mon kriye, e mon pa ganny repo.

³ Pourtan, ou menm ki Sen. Pep Izrael i sant ou louanz otour ou tronn.

⁴ Nou bann zanset ti fer ou konfyans; zot ti kont lo ou e ou ti delivre zot.

⁵ Zot ti kriy ver ou, e zot ti ganny delivre. Zot ti fer ou konfyans e zot pa'n dezapwente.

⁶ Mon nepli en zonm. Mon ganny trete koman en lever. Dimoun i ensilte mwan, zot tou zot mepriz mwan.

⁷ Tou sa ki war mwan i boufonn mwan; zot gognard mwan, zot sekwe zot latet:

⁸ In met son konfyans dan SENYER. Alor, ki SENYER i delivre li. SENYER ava delivre li akoz i kontan li.

⁹ Ou ki ti tir mwan dan vant mon manman, e ou ti plas mwan an sekirite dan son lebra.

¹⁰ Depi zour mon nesans, mon ti ganny konfye avek ou. Depi dan vant mon manman, ou'n touzour mon Bondye.

¹¹ Pa reste lwen avek mwan; danze i pros e napa personn pour ed mwan.

¹² Mon bann lennmi, bann toro, in antour mwan; bann toro ki sorti Basann in anserkle mwan.

¹³ Parey bann lyon feros, zot ti ouver zot lagel, pare pour desir mwan.

¹⁴ Mon lafors in koule parey delo; tou mon bann lezo in large. Parey lasir, mon leker i fonn dan mon pwatrin.

¹⁵ Mon labous i sek parey later dekoke dan lasesres. Mon lalang i reste kole dan mon pale. Ou'n kit mwan dan lapousyer lanmor.

¹⁶ En group malfeter in antour mwan; zot parey en group lisyen ki'n anserkle mwan. Zot in pers mon lanmen ek mon lipye.

¹⁷ Mon kapab kont tou mon bann lezo. Dimoun pa tir zot lizye lo mwan.

¹⁸ Zot partaz mon lenz ant zot e zot tir osor mon rob, pour konnen lekel ki pou gannyen.

¹⁹ Me ou SENYER! Pa reste lwen avek mwan. Ou ki mon lafors! Vin vit pour sekour mwan.

²⁰ Delivre mwan dan lanmor vyolan; sov mwan dan grif bann lisyen.

²¹ Sov mwan dan lagel lyon; delivre mwan kont korn bann toro sovaz.

²² Mon pou anons ou non avek mon bann frer. Mon pou loue ou devan lasanble.

²³ Loue SENYER! Ou ki annan respe pour li e ador li. Zot bann desandan Zakob! Rann li glwar. Zot bann desandan Izrael! Ador li avek reverans.

²⁴ SENYER pa'n ni rezet, ni mepriz dimoun pov ki dan maler. I pa ti kasyet li son figir; i ti reponn li kan i ti kriy ver li.

²⁵ SENYER! Mon pou loue ou dan gran lasanble pour sa ki ou'n fer pour mwan. Mon pou akonpli mon promes devan bann ki ador ou.

²⁶ Bann pov ava kapab manze ziska zot rasazye. Dimoun ki rod SENYER pou loue li. Zot ava viv pour touzour!

²⁷ Later antye, ava mazin SENYER. Zabitan later ava retourn ver li. Tou bann fanmir bann pep ava ador li.

²⁸ Annefe, SENYER i lerwa; i renny lo tou bann nasyon.

²⁹ Tou bann gran lo later ki'n manze, pou prostern devan li. Tou bann ki desann dan later, ki pa kapab reste vivan, pou kourbe devan li.

³⁰ Zot bann desandan pou servi li; zot pou koz lo SENYER avek zenerasyon fitir.

³¹ Zot pou rakont avek zot desandans, tou bann mervey ki SENYER in fer.