Psonm 20 - Labib An Kreol Seselwa

Lapriyer pou Demann Laviktwar

Psonm David. Pour sef lakoral.

¹ SENYER ava reponn ou ler ou dan lapenn. Bondye Zakob ava protez ou.

² Dan son tanp, i ava anvoy son led e depi Siyon, i ava soutenir ou.

³ I ava mazin tou ou bann lofrann e aksepte ou bann sakrifis konplet.

⁴ I ava akord ou sa ki ou leker i dezire e realiz tou ou bann plan.

⁵ Alor, nou ava selebre ou laviktwar. Nou ava fer flote paviyon lo non nou Bondye. SENYER ava akonpli tou sa ki ou demann li.

⁶ Aprezan, mon konnen ki SENYER pou sov sa enn ki i'n konsakre. Depi son sanktyer dan lesyel, i pou reponn li e donn li gran laviktwar par lafors son lanmen drwat.

⁷ Serten i kont lo zot kales lager; lezot lo zot seval. Me nou, nou met nou konfyans dan SENYER nou Bondye.

⁸ Alor, zot pou pliye e tonbe. Me nou, nou pou reste debout.

⁹ SENYER! Donn lerwa laviktwar. Reponn nou ler nou apel ou.