Psonm 18 - Labib An Kreol Seselwa

Remersiman pour Laviktwar

Pour sef lakoral. Lerwa David ti sant sa psonm pour SENYER ler i ti ganny delivre dan lanmen Sail ek lezot son bann lennmi.

¹ SENYER! Mon kontan ou. Ou menm mon lafors.

² SENYER i mon Ros protekter, mon fortres e mon liberater. I mon Bondye, mon Ros protekter, kot mon an sekirite. I mon korn ki delivre mwan; i mon soutyen.

³ Mon apel SENYER, mon loue li. I delivre mwan kont mon bann lennmi.

⁴ Lemonn lanmor ti'n antortiy mwan; bann gro laroul destriksyon ti fer mwan per.

⁵ Lasenn lemonn lanmor ti'n anmay mwan. Mon ti'n fini tonm dan son latrap.

⁶ Dan mon detres, mon ti apel SENYER; mon ti kriy ver mon Bondye pour son led. Depi son tanp, i ti antann mon lavwa, e i ti antann mon lapel.

⁷ Alor, later ti tranble e ganny sekwe; bann fondasyon montanny ti osi tranble. Zot ti osi sekwe, akoz SENYER ti'n ankoler.

⁸ Lafimen ti sorti dan son nennen, e labrez ek laflanm ti sorti dan son labous.

⁹ I ti deroul lesyel e i ti desann avek en nyaz epe anba son lipye.

¹⁰ I ti mont lo en seriben e i ti anvole. I ti plannen lo lezel divan.

¹¹ I ti anvlop li dan fernwanr. Bann nyaz epe, ranpli avek delo ti antour li.

¹² Devan li, zekler ti anvoy lagrel ek letensel dife atraver bann gro nyaz.

¹³ Dan lesyel, lavwa SENYER ti rezonnen parey loraz.

¹⁴ I ti lans son bann dart e dispers bann lennmi. I ti lans bann zekler e zot ti taye.

¹⁵ SENYER! Devan ou bann menas, devan tanpet ou lakoler, fon lanmer ti aparet e fondasyon later ti ganny ekspoze.

¹⁶ Alor, depi lao dan lesyel, SENYER ti anvoy lanmen e atrap mwan. I ti tir mwan dan sa gran kouran delo.

¹⁷ I ti delivre mwan dan lanmen mon bann lennmi ki pwisan, e kont sa bann ki ay mwan, akoz zot ti tro for pour mwan.

¹⁸ Zot ti atak mwan zour mon ti dan maler; me SENYER in vin sekour mwan.

¹⁹ In tir mwan dan danze, in liber mwan; in sov mwan, akoz i kontan mwan.

²⁰ SENYER i rekonpans mwan akoz mon'n reste fidel; i beni mwan akoz mon lanmen i prop.

²¹ Mon'n met an pratik komannman SENYER. Mon'n reste fidel anver mon Bondye.

²² Mon'n gard tou son bann lalwa. Mon pa'n dezobei son bann regleman.

²³ Mon san repros devan li. Mon'n evit fer okenn pese.

²⁴ SENYER in war dibyen ki mon'n fer e in rekonpans mwan, akoz mon lanmen i prop devan li.

²⁵ Ou fidel anver sa enn ki fidel. Ou bon anver sa enn ki bon.

²⁶ Ou pir avek sa enn ki pir; sever avek sa enn ki rize.

²⁷ Ou delivre dimoun ki senp. Ou fer bann orgeye bes zot lizye.

²⁸ SENYER! Mon Bondye! Ou ki alim mon lalanp. Ou menm mon lalimyer kan mon dan fernwanr.

²⁹ Avek ou led, mon kapab kraz en larme; avek mon Bondye, mon kapab sot en miray.

³⁰ Bondye i en gid parfe. Bann promes SENYER i vre; i en proteksyon pour tou sa bann ki vin pran refiz kot li.

³¹ Lekel ki Bondye apar SENYER? Lekel ki nou Ros protekter apar Bondye?

³² Bondye ki ranpli mwan avek lafors e i met mwan lo bon semen.

³³ I fer mwan taye parey en serf e met mwan debout lo montanny.

³⁴ I antrenn mwan pour konba; i ed mwan redi en fles an bronz.

³⁵ Ou donn mwan ou boukliye laviktwar. Ou soutenir mwan avek ou lanmen drwat. Ou led in rann mwan for.

³⁶ Ou donn plis lespas mon lipye, e ou anpes mwan tonbe.

³⁷ Mon pourswiv mon bann lennmi e mon atrap zot. Mon pa retournen ziska ki mon'n fini avek zot.

³⁸ Mon aplati zot, zot pa kapab leve. Mon met zot anba mon lipye.

³⁹ Ou ranpli mwan avek lafors pour konba. Ou fer mon bann lennmi pliye devan mwan.

⁴⁰ Ou fer mon bann lennmi sove devan mwan. Mon detri mon bann ladverser.

⁴¹ Zot kriye, me personn pa vin sov zot. Zot kriy ver SENYER, me i pa reponn zot.

⁴² Mon kraz zot parey lapousyer ki pe anvole dan divan. Mon mars lo zot parey labou lo semen.

⁴³ Ou delivre mwan kont soulevman lepep. Ou fer mwan sef bann nasyon. En pep ki mon pa konnen in vin mon serviter.

⁴⁴ De ki zot antann mon lavwa, zot obei. Bann etranze i vin flat mwan.

⁴⁵ Bann etranze i perdi kouraz. Zot sorti an tranblan dan zot landrwa kasyet.

⁴⁶ SENYER i vivan! Mon rann glwar mon Ros protekter. Mon egzalte Bondye mon Sover.

⁴⁷ I donn mwan laviktwar lo mon bann lennmi e fer bann pep soumet anba mwan.

⁴⁸ I delivre mwan kont mon bann lennmi. I donn mwan laviktwar lo sa bann ki atak mwan. I sov mwan kont dimoun ki fer vyolans.

⁴⁹ Pour tousala, mon pou loue ou parmi bann nasyon e sant an loner ou non.

⁵⁰ SENYER i donn son lerwa bokou laviktwar. I montre son fidelite anver sa enn ki i'n konsakre, anver David ek son desandans pour touzour.