Psonm 16 - Labib An Kreol Seselwa

Lapriyer Konfyans

¹ Mon Bondye! Protez mwan. Mon met mon konfyans dan ou.

² Mon dir SENYER: Ou menm mon Senyer. Ou menm sours tou mon lazwa.

³ Bann ki fidel dan sa pei, i donn mwan bokou plezir Zot sen e nob.

⁴ Dimoun ki swazir en lot bondye pou konn en kantite soufrans. Mon pa pou pran par dan zot bann sakrifis disan. Zot non pa pou sorti dan mon labous.

⁵ SENYER! Ou menm mon soutyen pour tou sa ki mon bezwen. Mon lavi i dan ou lanmen.

⁶ Mon kontan tou sa ki ou'n donn mwan. Porsyon ki mon gannyen i pli zoli.

⁷ Mon loue SENYER ki konsey mwan. Mon konsyans i gid mwan, menm dan lannwit.

⁸ Mon touzour fikse mon lizye lo SENYER. SENYER i touzour prezan devan mwan. Mon pa pou tonbe.

⁹ Alor, mon leker i dan lazwa e mon santi mwan an sekirite.

¹⁰ Ou pa pou abandonn mwan dan lemonn lanmor. Ou pa pou les ou zanmi fidel fini dan lafos.

¹¹ Ou fer mwan konn semen lavi. I annan labondans lazwa dan ou prezans. Pre avek ou, lakontantman pa zanmen fini.