Psonm 149 - Labib An Kreol Seselwa

En Kantik Louanz

¹ Loue SENYER! Sant en nouvo kantik an loner SENYER! Loue li dan lasanble bann fidel!

² Izrael! Montre ou lazwa akoz ou Kreater. Zabitan Zerizalenm! Selebre zot lerwa.

³ Loue son non avek ladans, avek tanbour, avek laarp; zwe bann lenstriman lanmizik pour loue son non.

⁴ SENYER i pran plezir dan son pep; i donn laviktwar bann ki pov.

⁵ Sant son laglwar, zot bann fidel! Sant zot lazwa ler zot dormi!

⁶ Ranpli zot labous avek louanz an loner Bondye avek zot lepe fite dan zot lanmen,

⁷ pour vanz bann nasyon e pini bann pep;

⁸ pour atas bann lerwa avek lasenn e zot bann sef avek bann lasenn an fer;

⁹ pour egzekit zizman ki'n ganny prononse kont zot. Sa i en loner pour tou dimoun ki obei SENYER. Loue SENYER!