Psonm 148 - Labib An Kreol Seselwa

Liniver Antye! Loue Bondye

¹ Loue SENYER! Loue SENYER depi dan lesyel! Loue li lao lo bann oter!

² Tou bann lanz! Loue SENYER. Tou liniver! Loue li.

³ Soley ek lalin! Loue li. Loue li! Tou bann zetwal ki briye.

⁴ Loue li! Lesyel ki lao e bann delo ki par lao lesyel.

⁵ Zot tou! Loue non SENYER. Akoz i ti donn lord e zot ti ganny kree.

⁶ In etabli zot pour touzour. In fikse en lalwa ki bezwen touzour ganny obei.

⁷ Loue SENYER depi lo later: Zot tou bann mons ki viv dan lanmer e lezot ki viv dan profonder losean;

⁸ dife ek lagrel, lannez ek brouyar, tanpet divan ki egzekit son komannman! Loue SENYER!

⁹ Bann montanny ek kolin; pye fri ek tou bann pye sed;

¹⁰ zannimo sovaz ek bann troupo; reptil ek zwazo;

¹¹ bann lerwa lo later e tou bann pep, bann sef e tou bann dirizan lo later!

¹² Bann zennzan ek bann zenn fiy, bann vyeyar ek bann zanfan!

¹³ Loue non SENYER akoz son non i pli gran ki tou. Son laglwar i depas later ek lesyel.

¹⁴ In rann son pep son lafors. Son bann fidel i sant son louanz. Pep Izrael i en pep pros avek li. Loue SENYER!