Psonm 146 - Labib An Kreol Seselwa

Louanz an Loner Bondye Sover

¹ Loue SENYER! Mon sant louanz SENYER.

² Mon pou sant louanz pour SENYER tan ki mon vivan. Mon pou sant pour mon Bondye tou mon lavi.

³ Pa met ou konfyans dan bann sef, dan bann imen ki pa kapab sov ou.

⁴ Kan zot rann zot dernyen souf, zot retourn dan later. Sa menm zour, zot bann plan i mor avek zot.

⁵ Byennere sa bann ki Bondye Zakob i zot sekour; bann ki met zot lespwar dan SENYER zot Bondye.

⁶ I'n fer lesyel, later, lanmer ek tou sa ki egziste. I tenir son promes pour touzour.

⁷ I azir dapre lazistis an faver bann ki ganny kraze; i donn manze sa enn ki lafen. SENYER i delivre bann prizonnyen.

⁸ SENYER i ouver lizye bann aveg. SENYER i redres sa bann ki'n kourbe. SENYER i kontan sa enn ki obei li.

⁹ SENYER i vey lo bann etranze. I protez bann vev ek bann orfelen, me i kas plan bann malfeter.

¹⁰ SENYER pou renny pour touzour; ou Bondye, Siyon, en zenerasyon a en lot. Loue SENYER!