Psonm 139 - Labib An Kreol Seselwa

Bondye I Konn Tou e I Pran Swen

Psonm David.

¹ SENYER! Ou'n egzamin mwan e ou konn mwan.

² Ou konnen ler mon asiz e ler mon leve. Ou konn tou mon lentansyon lontan avan.

³ Ou konnen kan mon marse e kan mon repoze; ou konn tou mon parkour.

⁴ SENYER! Avan menm ki mon ouver labous, ou konnen deza ki mon pou dir.

⁵ Ou antour mwan par tou kote; ou poz ou lanmen lo mwan.

⁶ Ou konn mwan dan en fason merveye. Sa i depas tou sa ki mon kapab konpran.

⁷ Kote mon pou ale lwen avek ou lespri? Kote mon pou sove lwen avek ou?

⁸ Si mon mont dan lesyel, ou la. Si mon desann dan lemonn lanmor, ou la.

⁹ Si mon anvole avek soley leve pour al reste lwen lo lot kote lorizon,

¹⁰ la osi, ou lanmen pou kondwir mwan; ou lanmen drwat pou tenir mwan for.

¹¹ Mon dir: Omwen fernwanr ava anvlop mwan e lalimyer otour mwan ava vin fernwanr.

¹² Menm teneb pa ase epe pour ou. Lannwit i osi kler ki lizour, teneb i parey lalimyer pour ou.

¹³ Ou ki'n kree tou mon bann lorgann. Ou'n trikot mwan dan vant mon manman.

¹⁴ Mon loue ou, akoz ou'n fer mwan en kreatir vreman merveye. Mon rekonnet ki tou sa ki ou'n fer i merveye.

¹⁵ Kan ou ti pe fer mwan dan sekre, kan ou ti pe trikot mwan dan profonder later, ou lizye ti deza lo mwan.

¹⁶ Mon pa ti ankor annan en laform, ou ti'n deza war mwan. Ou ti'n ekri dan liv tou bann zour ki mon pou viv, avan menm, ki en sel zour ti'n konmanse.

¹⁷ Mon Bondye! Mon pa kapab konpran ou. Ou bann panse i vreman tro difisil pour mwan konpran.

¹⁸ Si mon esey kont zot, i annan plis ki gren disab. Mon reveye, mon ankor avek ou.

¹⁹ Mon Bondye! Fer bann malfeter disparet. Sorti kot mwan, zot bann kriminel!

²⁰ Ou bann lennmi pe servi ou non pour tronpe; zot pronons ou non pour fer dimal.

²¹ SENYER! Mon ay sa bann ki ay ou. Mon deteste sa bann ki revolte kont ou.

²² Mon vreman ay zot; zot in vin bann lennmi pour mwan.

²³ Mon Bondye! Teste mwan e ou ava konnen ki mon annan lo mon leker. Egzamin mwan e ou ava dekouver mon lentansyon.

²⁴ Gete si mon lo bon semen e gid mwan lo semen leternite.