Psonm 138 - Labib An Kreol Seselwa

Lapriyer Remersiman

Psonm David.

¹ SENYER! Mon remersye ou avek tou mon leker; mon loue ou devan tou bann lanz.

² Mon prosternen ver ou tanp e mon selebre ou non akoz ou fidelite ek ou lanmour, akoz ou'n akonpli plis ki sa ki ou ti'n promet.

³ Letan mon ti apel ou, ou ti reponn mwan; ou ti donn mwan plis kouraz.

⁴ SENYER! Tou bann lerwa lo later pou loue ou, akoz zot in antann promes ki sorti dan ou prop labous.

⁵ Zot pou sant lo sa ki SENYER in fer e dir: Laglwar SENYER i gran.

⁶ Menm si SENYER i lao dan lesyel, i pran ka avek bann ki pli mizerab e i rekonnet bann arogan depi byen lwen.

⁷ Menm si mon viv dan milye maler, ou protez mon lavi; ou lev ou lanmen kont lakoler mon bann lennmi e ou lanmen drwat i delivre mwan.

⁸ SENYER pou fer tou pour mwan. SENYER! Ou fidelite i dire pour touzour. Pa abandonn sa enn ki ou lanmen in fer.