Psonm 135 - Labib An Kreol Seselwa

Loue Senyer

¹ Loue SENYER! Loue non SENYER! Sant louanz, zot tou bann serviter SENYER

² ki debout dan tanp SENYER, dan lakour tanp nou Bondye.

³ Loue SENYER akoz SENYER i bon! Sant pour son non, akoz i bon.

⁴ Annefe, SENYER in swazir Zakob zis pour li, Izrael koman son byen personnel.

⁵ Mwan, mon konnen ki SENYER i gran; nou SENYER i par lao tou lezot bondye.

⁶ SENYER i fer tou sa ki i oule, dan lesyel e lo later, dan lanmer e dan bann profonder.

⁷ I fer nyaz leve lwen lo lorizon; i anvoy zekler ek lapli; i fer divan sorti dan son rezerv.

⁸ Dan Lezip, i ti touy tou bann premye ne, dimoun koman zannimo.

⁹ I'n anvoy dan Lezip bann siny ek bann prodiz kont Faraon ek tou son bann serviter.

¹⁰ I ti detri en kantite nasyon e touy bann lerwa pwisan:

¹¹ Sihonn, lerwa bann Amorit, Og, lerwa Basann e tou bann lerwa Kanaan.

¹² I ti donn zot sa bann pei koman en patrimwann pour son pep Izrael.

¹³ SENYER! Ou non pou reste pour touzour. SENYER! Ou pou ganny nonmen atraver bann zenerasyon; ou ki Bondye.

¹⁴ Annefe, SENYER pou rann son pep lazistis; i pou pran pitye pour son bann serviter.

¹⁵ Zidol bann nasyon in ganny fer avek larzan e avek lor; zot in ganny fabrike par lanmen zonm.

¹⁶ Zot annan labous, me zot pa koze; zot annan lizye, me zot pa war;

¹⁷ zot annan zorey, me zot pa tande. Napa okenn respirasyon dan zot labous.

¹⁸ Sa enn ki'n fabrik zot e ki'n fer zot konfyans, pou vin parey zot.

¹⁹ Pep Izrael! Loue SENYER. Fanmir Aaron! Loue SENYER.

²⁰ Bann Levit! Loue SENYER. Zot ki annan respe pour SENYER! Loue SENYER.

²¹ Depi Siyon! Loue SENYER zot ki reste dan Zerizalenm. Loue SENYER!