Psonm 121 - Labib An Kreol Seselwa

Senyer I Mon Protekter

Kantik pour pelrinaz.

¹ Mon lev mon lizye ver bann montanny. Kote mon sekour pou sorti?

² Sekour i sorti kot SENYER, ki'n kree lesyel ek later.

³ I pa pou les ou fer en fo pa; ou protekter pa asoupi.

⁴ Sa enn ki protez Izrael i pa ferm lizye, i pa ni dormi.

⁵ SENYER i ou protekter. SENYER i ou lonbraz ki reste lo ou kote drwat.

⁶ Lizour, larder soley pa pou bril ou, ni lalin pa pou fer ou dimal dan lannwit.

⁷ SENYER pou protez ou kont tou maler. I pou vey lo ou lavi.

⁸ SENYER pou vey lo ou depar e lo ou retour, apartir ozordi e pour touzour.