Psonm 119 - Labib An Kreol Seselwa

Lalwa Senyer

¹ Byennere sa bann ki annan en konportman san defo e ki mars dapre lalwa SENYER.

² Byennere sa bann ki gard son bann lord, ki rod li avek tou zot leker.

³ Zot pa fer sa ki mal me zot mars dan son semen.

⁴ Ou'n donn ou bann direktiv pour ki zot ganny met an pratik avek swen.

⁵ Mon dezir byen kondwir mwan pour mars dapre ou bann regleman.

⁶ Alor, mon pa pou kanmi ler mon pou get tou ou bann komannman.

⁷ Mon pou loue ou avek tou mon leker, an mezir ki mon pou etidye ou bann desizyon ki zis.

⁸ Mon pou obzerv ou bann regleman; pa abandonn mwan konpletman.

Lobeisans Lalwa Senyer

⁹ Konman eski en zenn i kapab gard son lavi pir? Kan i obei parol SENYER.

¹⁰ Mon rod ou avek tou mon leker; pa les mwan egare lwen avek ou komannman.

¹¹ Mon gard ou parol dan mon leker, pour mwan pa fer pese kont ou.

¹² Mon loue ou, SENYER! Ansenny mwan ou bann regleman.

¹³ Mon labous i repet tou bann desizyon ki ou prononse.

¹⁴ Mon kontan swiv ou bann lalwa, konmsi mon posed tou larises.

¹⁵ Mon pou medit lo ou bann direktiv e fikse mon regar lo semen ki ou endike.

¹⁶ Mon pran plezir dan ou bann regleman; mon pa pou oubliy ou parol.

Lazwa pour Obzerv Lalwa Senyer

¹⁷ Montre ou serviter ou labonte, pour ki i gard ou parol.

¹⁸ Ouver mon lizye pour mwan kontanple mervey ki dan ou bann lalwa.

¹⁹ Mon zis en pasaze lo later; pa kasyet mwan ou bann komannman.

²⁰ Mon dezir touzour met an pratik ou bann desizyon.

²¹ Ou reprimann bann arogan, bann modi ki mars lwen avek ou komannman.

²² Debaras mwan avek dezoner ek mepri, akoz mon'n gard ou bann lord.

²³ Menm si bann sef pe fer konplo kont mwan, ou serviter i medit lo ou bann regleman.

²⁴ Ou bann lord i fer mwan plezir; zot mon bann konseye.

Determinasyon pour Obei Lalwa Senyer

²⁵ Mon pe trennen dan lapousyer. Fer mwan reviv dapre ou parol.

²⁶ Kan mon ti rakont ou mon lavi, ou ti reponn mwan. Ansenny mwan ou bann regleman.

²⁷ Fer mwan sezi semen ou bann direktiv e mon ava medit lo ou bann mervey.

²⁸ Mon plere avek sagren. Relev mwan dapre ou parol.

²⁹ Elwanny semen mansonz avek mwan. Dan ou bonte, fer mwan konn ou lalwa.

³⁰ Mon'n swazir semen laverite; mon soumet mwan devan ou bann desizyon.

³¹ SENYER! Mon fye lo promes ou parol; pa fer mwan tonm dan laont.

³² Mon depese swiv semen ou bann komannman, akoz ou'n ouver mon lespri.

Lapriyer pour Konpran Lalwa Bondye

³³ SENYER! Fer mwan konpran ou bann komannman, pour mwan touzour met zot an pratik.

³⁴ Donn mwan disernman, pour mwan konpran ou lalwa e met li an pratik avek tou mon leker.

³⁵ Gid mwan lo semen ou bann komannman akoz mon kontan met zot an pratik.

³⁶ Donn mwan sa dezir swiv ou bann lord e non pa rod mon prop lentere.

³⁷ Pa les mon lizye ganny anbete par keksoz ki napa valer. Fer mwan viv dapre ou lavolonte.

³⁸ Realiz pour ou bann serviter sa promes ki ou ti fer avek sa bann ki obei ou.

³⁹ Protez mwan kont dezoner. I fer mwan per, akoz ou bann desizyon i zis.

⁴⁰ Ou konnen mon kontan viv dapre ou bann direktiv. Fer mwan viv dapre ou lazistis.

Met ou Konfyans dan Lalwa Senyer

⁴¹ SENYER! Fer ou fidelite ariv kot mwan e vin sov mwan dapre ou promes.

⁴² Alor, mon ava kapab reponn sa bann ki ensilte mwan, akoz mon kont lo ou parol.

⁴³ Pa les mwan zanmen trair laverite, akoz mon kont lo ou bann desizyon.

⁴⁴ Mon pou touzour met ou lalwa an pratik e pour touzour.

⁴⁵ Mon pou mars lib, akoz mon'n rod ou bann direktiv.

⁴⁶ Mon pa pou onte fer konnen ou bann lord devan bann lerwa.

⁴⁷ Mon pran plezir obeir ou bann komannman, ki mon kontan bokou.

⁴⁸ Mon lev mon lanmen ver ou bann komannman ki mon kontan bokou. Mon pou medit lo ou bann regleman.

Konfyans dan Lalwa Senyer

⁴⁹ Pa oubliy parol ki ou ti dir avek ou serviter e ki'n donn li konfyans.

⁵⁰ Sa i rekonfort mwan dan mon detres; ou promes i redonn mwan lavi.

⁵¹ Bann arogan pa arete gognard mwan; me mon pa pou aret gard ou bann lalwa.

⁵² SENYER! Mon mazin ou bann desizyon dan lepase; zot donn mwan en konsolasyon.

⁵³ Mon lakoler i monte ler mon mazin bann malfeter ki pa obei ou lalwa.

⁵⁴ Ou bann regleman i size mon bann sanson la kot mon viv.

⁵⁵ SENYER! Dan lannwit, mon apel ou non pour mwan obei ou lalwa.

⁵⁶ Pour mwan, sa ki konte, se obeir ou bann direktiv.

Lobeisans pour Lalwa Senyer

⁵⁷ SENYER! Ou mon par. Mon promet gard ou bann parol.

⁵⁸ Avek tou mon leker mon demann ou: Pran pitye pour mwan parey ou'n promet.

⁵⁹ Mon'n reflesi lo mon mannyer viv. Mon oule retourn ver ou bann lord.

⁶⁰ Mon depese, mon pa ezite pour obeir ou komannman.

⁶¹ Mon pa oubliy ou bann lalwa, menm si bann malfeter i met mwan dan en latrap.

⁶² Akoz ou bann desizyon i zis, mon leve lannwit pour remersye ou.

⁶³ Mon frekant tou dimoun ki respekte ou, ki obei ou bann direktiv.

⁶⁴ SENYER! Ou fidelite i ranpli later; ansenny mwan ou bann regleman.

Valer Lalwa Senyer

⁶⁵ SENYER! Parey ou'n promet, ou'n fer mwan, ou serviter, dibyen.

⁶⁶ Ansenny mwan pour mwan ganny en bon disernman ek konnesans, akoz mon fer konfyans ou komannman.

⁶⁷ Avan, mon ti'n egare, mon pa ti konnen ki mon ti pe fer. Me aprezan, mon pe gard ou komannman.

⁶⁸ Ou bon e ou fer dibyen. Ansenny mwan ou bann regleman.

⁶⁹ Bann arogan pe sali mwan avek zot mansonz. Me mon gard ou bann direktiv avek tou mon leker.

⁷⁰ Zot leker i ensansib, kouver avek lagres; me mon pran plezir dan ou lalwa.

⁷¹ In fer mwan dibyen ki mon'n ganny imilye. Konmsa, mon'n kapab etidye ou bann regleman.

⁷² Lalwa ki sorti dan ou labous i pli bon pour mwan ki milyon lobze annor e annarzan.

Lalwa Senyer I Zis

⁷³ Ou lanmen in form mwan e in fer mwan for. Donn mwan disernman pour mwan aprann ou bann komannman.

⁷⁴ Sa enn ki obei ou i kontan ler i war mwan, akoz mon'n met lespwar dan ou parol.

⁷⁵ Mon konnen SENYER, ki ou bann zizman i zis e ou'n byen fer imilye mwan.

⁷⁶ Ou fidelite i en konsolasyon pour mwan parey ou ti promet ou serviter.

⁷⁷ Montre mwan ou mizerikord. Alor mon ava reviv, akoz ou lalwa i donn mwan lazwa.

⁷⁸ Fer onte bann orgeye ki trenn mwan dan labou. Mwan, mon pou medit lo ou bann direktiv.

⁷⁹ Bann ki annan respe pour ou ava vin kot mwan pour konn ou bann lord.

⁸⁰ Mon pou swiv ou bann regleman avek tou mon leker, pour ki mon pa ganny imilye.

Lapriyer pour Demann Delivrans

⁸¹ Mon fatige espere pour ou vin sov mwan. Mon met mon konfyans dan ou parol.

⁸² Mon lizye i fatige afors esper sa ki ou'n promet. Mon demande: Kan ou pou konsol mwan?

⁸³ Mon'n vin parey en vye sak lapo; me mon pa oubliy ou bann regleman.

⁸⁴ Ankor konbyen letan ou serviter pou bezwen espere? Kan ou pou ziz mon bann persekiter?

⁸⁵ Bann arogan ki mepriz ou lalwa in fouy bann latrap pour fer mwan tonbe.

⁸⁶ Tou ou bann komannman i montre ou fidelite. Mon pe ganny persekite san rezon. Sekour mwan!

⁸⁷ Zot in preski fer mwan disparet lo later. Me mon pa'n abandonn ou bann direktiv.

⁸⁸ Dan ou fidelite, fer mwan viv, pour ki mon ava obei bann lord ki sorti dan ou labous.

Lafwa dan Lalwa Senyer

⁸⁹ Pour touzour, SENYER, ou parol in ganny fikse dan lesyel.

⁹⁰ Ou fidelite i pour touzour. Ou'n fikse later e i reste touzour an plas.

⁹¹ Ozordi, tou keksoz i egziste dapre ou lord. Tou i la pour servi ou.

⁹² Si ou lalwa pa ti sours tou mon lazwa, mon ti ava'n mor dan lanmizer.

⁹³ Mon pa pou zanmen oubliy ou bann direktiv, akoz ou'n fer mwan reviv.

⁹⁴ Mon pour ou. Sov mwan akoz mon'n rod ou bann direktiv.

⁹⁵ Bann malfeter pe rod fer mwan disparet; me mon pa oubliy ou bann lord.

⁹⁶ Mon'n konpran ki tou keksoz i annan en limit; me ou bann komannman i san limit.

Lanmour pour Lalwa Senyer

⁹⁷ Pa mon kontan ou komannman! Mon medit lo la tou le zour.

⁹⁸ Ou komannman i rann mwan pli saz ki mon bann lennmi. I toultan dan mon lespri.

⁹⁹ Mon konpran pli byen ki tou mon bann ansennyan, akoz mon medit ou bann lord.

¹⁰⁰ Mon annan plis disernman ki bann vyeyar, akoz mon obei ou bann direktiv.

¹⁰¹ Mon'n evite mars dan move semen pour mwan gard ou promes.

¹⁰² Mon respekte ou bann desizyon akoz ou ki'n enstri mwan.

¹⁰³ Ou bann parol i dou dan mon labous. I pli dou ki dimyel.

¹⁰⁴ Ou bann direktiv i rann mwan saz. Alor, mon deteste tou semen mansonz.

Lalwa Senyer I Ekler Mwan

¹⁰⁵ Ou parol i en lalanp pour ekler mon lipye e en lalimyer lo mon semen.

¹⁰⁶ Mon'n fer serman pour mwan tenir e gard ou bann desizyon ki zis.

¹⁰⁷ Mon dan en gran maler. SENYER! Fer mwan reviv dapre ou parol.

¹⁰⁸ SENYER! Aksepte mon lapriyer louanz. Ansenny mwan ou bann desizyon.

¹⁰⁹ Mon lavi i touzour an danze; me mon pa oubliy ou lalwa.

¹¹⁰ Bann malfeter in met en latrap pour mwan; me mon pa'n abandonn ou bann direktiv.

¹¹¹ Ou bann lord i mon patrimwann pour touzour. Zot met lazwa dan mon leker.

¹¹² Mon'n fer tou pour met an pratik ou bann regleman; sanmenm mon rekonpans pour touzour.

Sekirite dan Lalwa Senyer

¹¹³ Mon deteste dimoun ki pa kapab deside e mon kontan ou lalwa.

¹¹⁴ Ou menm mon protekter e mon boukliye. Mon met mon konfyans dan ou parol.

¹¹⁵ Ou ki fer sa ki mal! Dekile kot mwan. Les mwan obzerv bann komannman mon Bondye.

¹¹⁶ Soutenir mwan parey ou'n promet e mon ava viv; pa les mwan tonbe, mon'n met mon konfyans dan ou.

¹¹⁷ Soutenir mwan e mon ava ganny sove. Mon pa zanmen oubliy ou bann regleman.

¹¹⁸ Ou rezet tou sa bann ki abandonn ou regleman. Tou sa ki zot fer pour tronpe pa servi.

¹¹⁹ Ou fer tou bann move dimoun dan pei disparet parey salte. Alor, mon kontan ou bann lord.

¹²⁰ Mon lekor i ganny frison akoz respe devan ou. Ou bann desizyon i fer mwan per.

Lobeisans pour Lalwa Senyer

¹²¹ Mon'n fer sa ki zis e byen. Pa abandonn mwan dan lanmen mon bann lennmi.

¹²² Promet ki ou ava fer boner ou serviter; pas les bann arogan kraz mwan.

¹²³ Mon lizye i fatige afors esper ou delivrans e war ou promes realize.

¹²⁴ Tret ou serviter dapre ou fidelite; ansenny mwan ou bann regleman.

¹²⁵ Mon ou serviter; ouver mon lespri pour mwan konn ou bann lord.

¹²⁶ Senyer! In ler pour ou azir, akoz ou lalwa in ganny vyole.

¹²⁷ Mon vreman kontan ou bann komannman plis ki lor, menm plis ki lor pir.

¹²⁸ Alor, mon swiv tou ou bann direktiv akoz zot zis. Mon deteste tou semen mansonz.

Dezir pour Obeir Lalwa Senyer

¹²⁹ Ou bann lord i merveye. Alor, mon met zot an pratik.

¹³⁰ Revelasyon ou parol i donn lalimyer; i donn disernman sa enn ki senp.

¹³¹ Mon anval tou ou bann parol, akoz mon kontan ou bann komannman.

¹³² Get mwan e pran pitye pour mwan, parey ou abitye fer pour sa bann ki kontan ou non.

¹³³ Parey ou'n promet, gard mwan lo bon semen. Pa zanmen les lemal domin mwan.

¹³⁴ Delivre mwan dan lanmen dimoun ki kraz mwan, e mon ava kapab gard ou bann direktiv.

¹³⁵ Beni mwan ou serviter avek bonte; ansenny mwan ou bann regleman.

¹³⁶ Mon larm i koule parey en larivyer, akoz dimoun pa obei ou lalwa.

Lalwa Senyer I Zis

¹³⁷ SENYER ou zis e ou bann desizyon i drwat.

¹³⁸ Bann lord ki ou'n donnen i zis e vreman fidel.

¹³⁹ Mon gran lanmour pour ou i brile dan mwan akoz mon bann lennmi i oubliy ou bann parol.

¹⁴⁰ Ou bann parol in ganny teste e ou serviter i kontan zot.

¹⁴¹ Menm si mon pti e ganny meprize, mon pa oubliy ou bann direktiv.

¹⁴² Ou lazistis i eternel, ou lalwa i laverite.

¹⁴³ Maler ek langwas in sezi mwan. Me mon kontan obei ou bann komannman.

¹⁴⁴ Ou bann lord i zis pour touzour. Donn mwan disernman pour mwan viv.

Lapriyer Delivrans

¹⁴⁵ Mon apel ou avek tou mon leker. SENYER reponn mwan. Mon pou obzerv ou regleman.

¹⁴⁶ Mon kriy ou; vin sov mwan pour mwan kapab met an pratik ou bann lord.

¹⁴⁷ Byen avan soley i leve, mon kriy ver ou. Mon kont lo ou bann parol.

¹⁴⁸ Mon lizye i reste ouver tou lannwit, pour mwan medit lo ou parol.

¹⁴⁹ SENYER! Dan ou fidelite, ekout mon lavwa. Dan ou zizman, fer mwan reviv.

¹⁵⁰ Bann ki persekit mwan avek lentansyon pour fer dimal pe aprose; zot lwen avek ou lalwa.

¹⁵¹ Me ou SENYER! Ou pros e tou ou bann komannman i laverite.

¹⁵² Depi lontan, mon konnen ki ou'n etabli ou bann lord pour touzour.

Demann Sekour

¹⁵³ Get mon maler e delivre mwan, akoz mon pa'n oubliy ou lalwa.

¹⁵⁴ Defann mon ka e sov mwan. Fer mwan viv dapre ou parol.

¹⁵⁵ Bann malfeter pa pou ganny delivrans, akoz zot pa obei ou bann regleman.

¹⁵⁶ SENYER! Ou konpasyon i gran. Fer mwan viv dapre ou bann lalwa.

¹⁵⁷ Mon annan bokou persekiter ek en kantite lennmi. Me mwan, mon pa'n abandonn ou lord.

¹⁵⁸ Ler mon get bann tret, mon ganny degou, akoz zot pa obei ou komannman.

¹⁵⁹ Gete koman mon kontan ou bann direktiv. Fer mwan viv dapre ou fidelite.

¹⁶⁰ Tou ou parol i laverite; ou bann desizyon i zis e bon pour touzour.

Lanmour pour Lalwa Senyer

¹⁶¹ Bann sef i persekit mwan san rezon. Me mon annan respe zis pour ou parol.

¹⁶² Ou parol i donn mwan lazwa parey sa enn ki'n dekouver en gro trezor.

¹⁶³ Mon deteste mansonz e mon degout li. Se ou lalwa ki mon kontan.

¹⁶⁴ Mon loue ou set fwa par zour akoz ou bann desizyon i zis.

¹⁶⁵ Pour sa bann ki kontan ou lalwa, zot zouir lape; zot pa rankontre okenn lobstak.

¹⁶⁶ SENYER! Mon kont lo ou delivrans. Alor, mon obei ou bann komannman.

¹⁶⁷ Mon annan respe pour ou bann lord; vreman, mon kontan zot.

¹⁶⁸ Mon annan respe pour ou bann direktiv ek ou bann lord; ou war tou sa ki mon fer.

Apel Osekour

¹⁶⁹ SENYER! Mon bann plent i monte ziska kot ou. Donn mwan disernman parey ou'n promet.

¹⁷⁰ Aksepte mon lapriyer e delivre mwan parey ou'n promet.

¹⁷¹ Mon labous ava proklanm ou louanz, akoz ou ansenny mwan ou bann regleman.

¹⁷² Mon labous ava sant ou bann promes, akoz ou bann komannman i laverite.

¹⁷³ Met ou lanmen pare pour sekour mwan, akoz mon'n swazir ou bann direktiv.

¹⁷⁴ SENYER! Mon pe esper ou delivrans; ou lalwa i rann mwan ere.

¹⁷⁵ Mon ava viv pour loue ou e ou bann desizyon ava ed mwan.

¹⁷⁶ Mon'n egare parey en mouton ki'n perdi semen. Vin rod ou serviter, akoz mon pa oubliy ou bann komannman.