Psonm 118 - Labib An Kreol Seselwa

Viv pour Rakont Mervey Senyer

¹ Loue SENYER akoz i bon! Son fidelite i dire pour touzour.

² Izrael! Repete: Son fidelite i dire pour touzour.

³ Bann desandan Aaron! Repete: Son fidelite i dire pour touzour.

⁴ Zot tou ki ador SENYER! Repete: Son fidelite i dire pour touzour.

⁵ Dan mon langwas, mon ti apel SENYER. SENYER ti reponn mwan; i ti rann mwan lib.

⁶ Si SENYER i lo mon kote, mon pa per nanryen. Ki en zonm i kapab fer mwan?

⁷ SENYER i lo mon kote pour ed mwan; mon pran plezir war defet mon lennmi.

⁸ I preferab rod proteksyon dan SENYER ki met konfyans dan en zonm.

⁹ I preferab rod proteksyon SENYER ki met konfyans dan dimoun enportan.

¹⁰ Tou bann nasyon ti'n anserkle mwan; me lo non SENYER, mon ti demont zot.

¹¹ Zot ti anserkle mwan, e antour mwan partou kote. Me lo non SENYER, mon ti demont zot.

¹² Zot ti antour mwan parey mous dimyel. Me zot ti tennyen parey en dife zerb sek; lo non SENYER, mon ti demont zot.

¹³ Zot ti bouskil mwan, pour fer mwan tonbe; me SENYER ti sekour mwan.

¹⁴ SENYER i mon lafors e mon pwisans; li, ki'n sov mwan.

¹⁵ Laklamasyon lazwa ek delivrans i rezonnen dan latant pep Bondye: Lanmen drwat SENYER in donn laviktwar.

¹⁶ Lanmen drwat SENYER in leve. Lanmen drwat SENYER in fer bann mervey!

¹⁷ Mon pa pou mor, mon pou viv e mon pou rakont bann mervey ki SENYER in fer.

¹⁸ SENYER in koriz mwan severman, me i pa'n les lanmor pran mwan.

¹⁹ Ouver pour mwan bann laport lazistis, mon pou antre e remersye SENYER.

²⁰ La laport SENYER: Bann ki zis ki pou antre par la.

²¹ Mon pou loue ou akoz ou'n reponn mwan, ou ki'n sov mwan.

²² Ros ki bann konstrikter ti rezete, in vin ros prensipal dan fondasyon.

²³ Sa i travay SENYER: I en mervey devan nou lizye.

²⁴ Sanmenm, sa zour ki SENYER in fer. Annou sante e rezouir dan lazwa!

²⁵ SENYER, nou sipliy ou! Sov nou. SENYER! Donn nou laviktwar.

²⁶ Beni sa enn ki pe vini lo non SENYER! Depi tanp SENYER nou loue ou.

²⁷ SENYER i sel Bondye. I'n kler nou avek son lalimyer. Form laprosesyon avek brans feyaz dan lanmen, monte ziska bann korn otour lotel.

²⁸ SENYER! Ou menm mon Bondye! Mon loue ou. Mon Bondye! Mon proklanm ou grander.

²⁹ Loue SENYER akoz i bon; son fidelite i dire pour touzour.