Psonm 114 - Labib An Kreol Seselwa

En Kantik pour Pak

¹ Kan pep Izrael ti sorti Lezip; kan lafanmir Zakob ti kit sa pep etranze,

² Zida ti vin sanktyer Bondye, Izrael son propriyete.

³ Lanmer ti sove ler i ti war sa; larivyer Zourden ti kile.

⁴ Montanny ti sote parey kabri, kolin parey zenn mouton.

⁵ Lanmer! Ki'n arive avek ou pour ou sove? Larivyer Zourden! Akoz ou rekile?

⁶ Montanny! Ki ou gannyen pour ou sote parey kabri? E ou kolin, pour fer parey en zenn mouton?

⁷ Later! Tranble devan SENYER, devan Bondye Zakob

⁸ ki sanz ros an basen delo e granit an en sours delo!