Psonm 112 - Labib An Kreol Seselwa

Lazwa En Bon Dimoun

¹ Loue SENYER! Byennere sa enn ki annan respe pour SENYER; i pran gran plezir pour son komannman.

² Son bann desandan pou pwisan dan pei; Zenerasyon dimoun ki drwat pou ganny beni.

³ Son lakaz i ranpli avek larises ek byennet; son lazistis i pour touzour.

⁴ Menm dan fernwanr, lalimyer i briye pour bann ki drwat. I ranpli avek konpasyon; i bon e i zis.

⁵ Byennere sa enn ki fer dibyen e ki prete; ki regle son bann zafer dapre lazistis.

⁶ Sa enn ki fer tousala, pa pou zanmen tonbe. I pa pou zanmen ganny oubliye.

⁷ Move nouvel pa fer li per; son leker i reste trankil. I met son konfyans dan SENYER.

⁸ Son leker i trankil, i pa per. I annan lasirans ki i pou war lanmor son ladverser.

⁹ Zot in donn avek bonker; zot in donn bann pov. Zot lazistis i reste pour touzour Zot lafors i ogmante avek loner.

¹⁰ Malfeter i mekontan ler zot war sa. Zot ankoler e zot grens zot ledan. Lespwar malfeter pou disparet.