Psonm 109 - Labib An Kreol Seselwa

Lapriyer En Dimoun ki dan Traka

En psonm David. Pour sef lakoral .

¹ Mon Bondye ki mon loue! Pa gard silans.

² Bann malfeter ek bann manter in ouver zot labous kont mwan. Zot pe koz lalang kont mwan.

³ Par tou kote, zot koz bann parol laenn e zot atak mwan san okenn rezon.

⁴ An rekonpans pour mon lanmitye, zot akiz mwan, alor ki mon priy pour zot.

⁵ Me zot rann mwan dimal pour dibyen; laenn dan plas lanmitye.

⁶ Zot dir: Rod en malfeter pour akiz li; met sa enn ki akiz li debout lo son kote drwat.

⁷ Les zot ziz li; menm son lapriyer i rekonnet li koupab.

⁸ Fer son lavi ganny rakoursi e les en lot ranplas li.

⁹ Son bann zanfan ava vin orfelen, e son fanm ava vin en vev.

¹⁰ Son bann zanfan ava vin vagabon e mandyan. Zot ava ganny sase dan bann debri kot zot reste.

¹¹ Dimoun ki i dwa ava sezi tou son byen. Bann etranze ava sezi tou sa ki i annan.

¹² Pa les personn montre li en pe labonte, ni pran pitye pour son bann orfelen!

¹³ Son bann desandan pou disparet e son non pou ganny efase apartir dezyenm zenerasyon!

¹⁴ Fot son papa ek son gran papa ava reste la, devan SENYER e pese son manman pa pou ganny efase.

¹⁵ SENYER pa zanmen oubliy zot fot e zot souvenir ava disparet lo later.

¹⁶ Annefe, sa dimoun pa'n zanmen mazin fer sa ki byen, me in persekit dimoun ki pov, ki dan bezwen e bann malere ziska lanmor.

¹⁷ I ti kontan modi: Aprezan i ava ganny modi! I pa ti kontan beni: Aprezan benediksyon ava pas akote li!

¹⁸ Pour li, donn malediksyon ti'n vin parey ou met en lenz. I ava penetre son lekor parey delo, parey delwil dan son lezo!

¹⁹ I ava parey en lenz ki i met otour li, parey en sang ki i mete tou le zour.

²⁰ Konmsa menm ki SENYER ava rekonpans mon bann akizater, sa bann ki dir dimal kont mwan.

²¹ Me ou, Senyer BONDYE! Pour loner ou non, fer keksoz pour mwan. Akoz ou bon e ki ou kontan mwan, vin sov mwan!

²² Mon pov, mon malere; mon leker i blese dan mwan.

²³ Mon lavi pe ale parey lonbraz lafen lazournen; mon'n ganny sase parey en sotrel.

²⁴ Afors zennen, mon lazanm i feb. Mon lekor i zis lapo ek lezo.

²⁵ Mon bann akizater i gognard mwan; ler zot war mwan dan semen, zot sekwe latet.

²⁶ Vin ed mwan, SENYER, mon Bondye! Ou kontan mwan. Sov mwan!

²⁷ Ki zot rekonnet ki ou lanmen SENYER, ki'n fer tousala.

²⁸ Ler zot modi, ou, ou beni. Zot ti atak mwan, zot ganny imilye.

²⁹ Fer ki mon bann akizater i ganny dezonore. Ki zot ganny kouver ek laont, parey en lenz.

³⁰ Mon pou kriye pour loue SENYER; mon pou loue li dan milye lafoul.

³¹ I debout lo kote drwat bann malere pour sov zot kont sa bann ki oule kondann li anmor.