Psonm 105 - Labib An Kreol Seselwa

Bondye I avek son Pep

¹ Remersye SENYER! Proklanm son non! Fer bann nasyon konn son bann mervey!

² Sant pour li! Loue li avek lanmizik! Rakont son bann mervey!

³ Rann glwar son non sen! Zot tou ki rod SENYER! Rezoui.

⁴ Tourn ver SENYER e rod son pwisans! Rod kontinyelman son prezans!

⁵ Pa oubliy bann mervey ki i'n fer, son bann prodiz ek bann zizman ki i'n prononse,

⁶ Desandans son serviter, Abrahanm, bann garson Zakob ki i'n swazir.

⁷ Se li SENYER, nou Bondye. I egzers son zizman lo later antye.

⁸ I pa oubliy son lalyans pour touzour, son parol ki i'n donnen pour mil zenerasyon;

⁹ lalyans ki i ti fer avek Abrahanm, son serman ki i ti fer avek Izaak;

¹⁰ ki i'n etabli en lalwa pour Zakob e en lalyans eternel pour Izrael,

¹¹ I ti dir: Mon pou donn ou pei Kanaan, koman en patrimwann.

¹² Kan zot pa ti nonbre, zot ti en pti ponnyen pe viv koman etranze dan pei.

¹³ Zot ti sorti dan en rwayonm pour al dan en lot.

¹⁴ Me i pa ti les personn kraz zot. I ti repros bann lerwa lo zot size:

¹⁵ Pa tous bann ki mon'n konsakre; pa fer ditor mon bann profet.

¹⁶ I ti anvoy lafanmin dan pei e ti napa ase dipen.

¹⁷ I ti anvoy en zonm devan zot; sa ti Zozef, ki ti ganny vann koman en lesklav.

¹⁸ Son lipye ti ganny ansennen, en kolye an feray ti ganny met otour son likou.

¹⁹ Parol SENYER ti realize; sa ki i ti'n anonse ti arive.

²⁰ Lerwa ti donn lord larg li. Sa enn ki ti diriz bann pep ti liber li.

²¹ I ti met li ansarz son pale e diriz tou son rwayonm.

²² I ti annan lotorite lo tou bann sef. I ti ansenny lasazes bann ansyen dan rwayonm.

²³ Apre sa, Izrael ti desann Lezip; Zakob ti viv koman en etranze dan pei Kanm.

²⁴ SENYER ti miltipliy son pep e fer li vin pli for ki son bann lennmi.

²⁵ I ti sanz leker bann Ezipsyen, fer zot ay son pep e fer konplo kont son bann serviter.

²⁶ I ti anvoy son serviter Moiz ek Aaron ki i ti'n swazir.

²⁷ Zot ti fer bann aksyon etonan e bann mervey parmi bann zabitan pei Kanm.

²⁸ Bondye ti fer teneb vini e fernwanr ti tonm partou. Personn pa ti opoz son parol.

²⁹ I ti fer delo larivyer vin disan e tou bann pwason ti mor.

³⁰ Grenouy ti anvai zot pei ziska dan lasanm bann lerwa.

³¹ Lo son lord, bann lesen mous ek moustik ti anvai e kouver pei.

³² Dan plas lapli, ti annan lagrel e bann laflanm dife ti klate partou dan pei.

³³ I ti detri zot bann plantasyon rezen ek pye fig e kas tou bann pye dibwa ki dan zot pei.

³⁴ Lo son lord, sotrel ti vini an gran kantite.

³⁵ Zot ti devor tou bann plantasyon dan pei; zot ti manz tou zot rekolt.

³⁶ I ti donn lord touy tou bann premye zanfan dan Lezip, fri zot premye semans.

³⁷ Apre, i ti fer pep Izrael sorti, ranpli avek larzan ek lor. Personn dan son bann tribi pa'n reste deryer.

³⁸ Bann Ezipsyen ti kontan ler zot ti'n ale, akoz lafreyer ti'n sezi zot.

³⁹ I ti plas en nyaz pour protez zot; en dife ti ekler zot dan lannwit.

⁴⁰ Zot ti demann manze, e zot ti ganny zwazo; manze sorti dan lesyel ti annabondans.

⁴¹ I ti fann ros, delo ti sorti e koule atraver dezer parey en larivyer.

⁴² I pa oubliy son promes sakre ki i ti'n fer avek son serviter Abrahanm.

⁴³ Alor, i ti fer son pep sorti dan lazwa; son pep ki i ti'n swazir ti sant avek lazwa.

⁴⁴ I ti donn zot later lezot nasyon e zot ki pran posesyon larises bann pep.

⁴⁵ Konmsa, zot in kapab gard son bann komannman e obzerv son bann lalwa. Loue SENYER!