Psonm 104 - Labib An Kreol Seselwa

Louanz anver Kreater

¹ Mon loue SENYER. SENYER, mon Bondye! Ou vreman gran, antoure avek mazeste ek loner.

² Lalimyer i anvlop ou parey en dra; ou'n etal lesyel parey en tapi.

³ In poz fondasyon son gran demer lo delo. I fer nyaz vin son kales; i avans lo lezel divan.

⁴ I servi divan koman son mesaze; laflanm dife koman son serviter.

⁵ I fikse later lo son bann fondasyon; i pa pou zanmen bouze.

⁶ I servi losean pour kouver later parey en lenz; delo ti monte e kouver latet bann montanny.

⁷ Ler ou ti reprimann zot, zot ti fannen; zot ti taye ler zot ti antann tapaz ou loraz.

⁸ Zot ti mont par lao bann montanny e desann dan bann vale, dan landrwa ki ou ti'n fikse pour zot.

⁹ Ou ti fikse balizaz ki zot pa ti devre depase, pour ki delo pa kouver later ankor.

¹⁰ Ou fer sours delo sorti dan bann vale; i koul ant bann montanny.

¹¹ Tou bann zannimo sovaz i ganny delo pour bwar; bann bourik sovaz i vin satisfer zot laswaf.

¹² Bann zwazo i fer zot nik obor delo; zot sante dan feyaz.

¹³ Depi ou demer lao, ou aroz bann montanny; later i kontant li avek sa ki ou donn li.

¹⁴ Ou fer zerb pouse pour nouri betay; ou fer pouse bann plant pour imen ganny dekwa manze:

¹⁵ Diven pour fer leker zwaye, delwil pour fer klate figir e dipen pour redonn lafors.

¹⁶ Bann pye dibwa ek bann pye sed Liban ki SENYER in plante i ganny byen aroze.

¹⁷ Zwazo i fer zot nik partou dan brans; floranten i viv dan bann pye mangliye.

¹⁸ Kabri sovaz i viv dan leo montanny. Lapen sovaz i pran refiz dan kap ros.

¹⁹ Ou'n fer lalin pou mark letan; soley i kouse ler i fodre.

²⁰ Ou anvoy fernwanr e lannwit i tonbe; i ler pour bann zannimo lafore sorti.

²¹ Bann zenn lyon i kriye letan zot pe rod zot viktim; zot demann Bondye zot manze.

²² Ler soley i leve, zot retourn dan zot trou pour dormi.

²³ Dimoun i al travay; i trimouse ziska aswar.

²⁴ SENYER! Ou'n fer tou keksoz; tou in ganny fer avek lasazes. Later i ranpli avek tou sa ki ou'n kree.

²⁵ Ou'n osi kree lanmer ki gran e ki partou, ki ranpli avek en kantite zannimo pli pti koman pli gran.

²⁶ Bann navir i navige e Leviatan ki ou'n kree pour zwe avek li.

²⁷ Zot tou, zot kont lo ou pour ganny zot manze ler fodre.

²⁸ Zot pran zot par ki ou donn zot. Ou ouver ou lanmen e zot rasazye avek sa ki bon.

²⁹ Me ler ou vir ledo, zot per en kantite. Ler ou repran zot respirasyon, zot mor e zot retourn dan lapousyer.

³⁰ Ler ou soufle lo zot, zot tou, zot reganny lavi e tou i vin nouvo lo later.

³¹ Laglwar SENYER i dire pour touzour! SENYER i rezouir dan tou sa ki i'n fer!

³² I get later, e later in tranble; i tous bann montanny e zot ganny kouver avek lafimen.

³³ Mon pou sant pour SENYER tou mon lavi. Mon pou loue li toultan ki mon vivan.

³⁴ Mon swete ki mon parol i fer li plezir. Mon rezoui dan SENYER.

³⁵ Bann peser pou disparet lo later. Bann malfeter pou nepli egziste. Mon loue SENYER! Loue SENYER!