Psonm 102 - Labib An Kreol Seselwa

Lapriyer En Dimoun ki dan Lapenn

Lapriyer sorti kot en dimoun ki dan lapenn; ki nepli annan lafors; i met son konplent devan SENYER.

¹ SENYER! Ekout mon lapriyer. Ekout mon siplikasyon ki mont kot ou.

² Pa kasyet ou avek mwan kan mon dan lapenn. Ekout mwan ler mon apel ou. Pa tarde pour reponn mwan.

³ Mon lavi i disparet parey lafimen; mon bann lezo i brile parey dan en four.

⁴ Mon leker in ganny atake e i fletri parey zerb; mon'n perdi lanvi manze.

⁵ Afors plennyen, mon'n vin zis lapo ek lezo.

⁶ Mon parey en ibou dan dezer; parey en pti katiti dan landrwa abandonnen.

⁷ Mon pa dormi; mon parey en zwazo tousel lo en twa.

⁸ Tou le zour mon bann lennmi pe provok mwan. Sa bann ki gognard mwan, zot servi mon non pour modi.

⁹ Lasann i mon lasyet manze. Mon larm i melanze dan sa ki mon bwar.

¹⁰ Dan ou lakoler ou pini mwan; ou lev mwan anler e ou zet mwan lwen.

¹¹ Mon lavi pe fini parey lonbraz; mon pe fletri parey zerb.

¹² Me ou, SENYER! Ou lerwa pour touzour. Ou non pou dire atraver bann zenerasyon.

¹³ Ou pou leve, e ou pou pran pitye pour Zerizalenm, akoz in ler pour ou konsol li. Son ler in vreman arive.

¹⁴ Ou bann serviter i kontan son bann ros. Zot pran pitye pour son lapousyer.

¹⁵ Bann nasyon pou annan respe pour non SENYER; tou bann lerwa lo later pou respekte son laglwar.

¹⁶ Kan SENYER pou rekonstri Zerizalenm, i pou aparet dan tou son laglwar.

¹⁷ I pou ekout lapriyer bann ki'n ganny abandonnen e i pa pou rezet zot lapriyer.

¹⁸ Ekri sa pour bann zenerasyon fitir e sa nouvo pep ava loue SENYER:

¹⁹ Depi lao dan son sanktyer, SENYER in get anba. Depi lao dan lesyel, in get lo later

²⁰ pour li ekout bann prizonnyen plennyen e delivre bann ki ti'n ganny kondannen amor.

²¹ Alor, non SENYER ava ganny proklanmen dan Siyon e son louanz dan Zerizalenm.

²² La, tou bann pep e tou bann rwayonm ava rasanble pour zot ador SENYER.

²³ Letan mon ti ankor zenn, SENYER in diminyen mon lafors; in rakoursi mon lavi.

²⁴ Mon dir: Mon Bondye! Ou ki viv pour touzour! Pa pran mon lavi ler mon ankor zenn.

²⁵ Depi lontan, ou'n etabli fondasyon later; lesyel i travay fer par ou lanmen.

²⁶ Tousala pou disparet. Me ou, ou reste pour touzour; Tou pou ize parey en lenz. Ou sanz zot parey en lenz e zot pou disparet.

²⁷ Me ou, ou reste touzour parey e ou lavi pa zanmen fini.

²⁸ Bann zanfan ou serviter ava viv an sekirite; zot desandan ava viv anba ou proteksyon.